ಮೌನಿ

ಹೀಗೊಂದು ಪುರಾಣ

2011-10-21T02:52:00.000-07:00

ಇದೊಂದು ಕೆಲಸ ಇಲ್ಲದವನ ಹರಿಕತೆ ಅಂತಾದ್ರು ಅನ್ನಿ, ಬಾಯಿ ಹರುಕನ ಹರಕು ಪುರಾಣ ಅಂತಾದ್ರು ಅನ್ನಿ. ನಾನು ಮಾತ್ರ ನನ್ನ ಅಭಿಮಾನದ ನುಡಿಮುತ್ತುಗಳನ್ನ ಇವರಿಗೆ ಅರ್ಪಿಸಲೇ ಬೇಕು. ಈಗೀಗ ನನಗೆ ಮನಸಿನಲ್ಲಿ, ಕನಸಿನಲ್ಲಿ, ರಸ್ತೆಯಲ್ಲಿ, ಮನೆಯಲ್ಲಿ, ಕಛೇರಿಯಲ್ಲಿ, ದೇವಸ್ಥಾನದಲ್ಲಿ, ಎಲ್ಲೇ ಹೋದ್ರು ಇವರು ಕಾಣಿಸ್ತಾನೆ ಇರ್ಬೆಕಾದ್ರೆ, ನಿಮ್ಮತ್ರೆ ಇಷ್ಟು ಹಂಚಿಕೊಳ್ಳದಿದ್ರೆ ಹೇಗೆ? ಹಾಗೆ ಇವರೇನು ನಮ್ಮಂತೆ ಸಾಮಾನ್ಯದವರಲ್ಲ. ಇವರ ಮಹಿಮೆಗಳನ್ನು, ಲೀಲೆಗಳನ್ನು ಹಾಗೆಲ್ಲಾ ಒಂದೆರಡು ಮಾತಲ್ಲಿ ವರ್ಣಿಸಿ ಹೇಳಿ ಮುಗಿಸಲಿಕ್ಕು ಆಗುವದಲ್ಲ. ಇವರ ಬಗ್ಗೆ ನೀವೂ ಸ್ವಲ್ಪ ತಿಳದುಕೊಂಡ್ರೆ, ನೀವೂ ನನ್ನ ಹಾಗೆ ಇವರ ಆಭಿಮಾನಿಗಳಾದ್ರೂ ಆಗಬಹುದು! ಯಾರಿಗ್ಗೊತ್ತು? ಹಾಂಗೆ ಭಕ್ತಿಯಿಂದ ಕೇಳ್ತಾಹೋಗಿ!!

ಇವರ ಬಗ್ಗೆ ನನ್ನ ಆಕರ್ಷಣೆ ಇಂದು ನಿನ್ನೆಯದಲ್ಲ. ಇದು ಬಾಲ್ಯದಿಂದ ಬೆಳೆದು ಬಂದ ಪ್ರೀತಿ, ಭೀತಿ ಮತ್ತು ಕಿತಾಪತಿ! ಶಾಲೆಯ ಅಂಗಳದಲ್ಲಿ ಮಲಗಿರುವ ಇವರಿಗೆ ಮೋಜಿಗಾಗಿ ಕಲ್ಲು ಒಗೆದು ಕಾಲು ಕೀಳುವದು, ಇವರ ಮರಿಗಳ ಕದ್ದು ಬೇರೆಲ್ಲೋ ಒಯ್ಯುವಾಗ ಕಚ್ಚಿಸಿಕೊಳ್ಳುವದು, ಇವರುಗಳ ಗುಂಪಿಗೆ ಕಲ್ಲೆಸೆದು ಕುಇ ಕುಇ ಎಂದು ಓಡಿದವರ ಬೆನ್ನುಹತ್ತಿ ಅವರು ಒಮ್ಮೆಲೆ ತಿರುಗಿ ಗುರ್ ಎಂದಾಗ ಜೀವ ಬಾಯಿಗೆ ಬರುವದು, ಬೀದಿಯಲ್ಲಿರುವ ಇವರನ್ನು ಮನೆಯಲ್ಲಿ ಕಟ್ಟಿಹಾಕಲು ಪ್ರಯಾಸ ಪಡವದು,ಎಲ್ಲವೂ ನನ್ನ ಮಧುರ ಅನುಭವಗಳಲ್ಲಿ ದಾಖಲೆಯಾದವು. ಇವರ ಜಗಳ, ಪ್ರೀತಿ, ಸ್ನೇಹ, ಸಕಲ ಗುಣಗಳನ್ನೂ ಅತಿ ಹತ್ತಿರದಿಂದ ನೋಡುವ ಭಾಗ್ಯ ಅಥವಾ ದೌರ್ಭಾಗ್ಯ ಎರಡೂ ನನಗೊದಗಿ ಬಂದಿದ್ದಕ್ಕೆ ನನಗೆ ಅತೀವ ಸಂತೋಷವಿದೆ. ನಾಯಿ, ಕುನ್ನಿ, ಕಜ್ಜಿ ನಾಯಿ,ಕಚ್ಚೋನಾಯಿ, ಹಡಬೆ ನಾಯಿ, ಬೀದಿನಾಯಿ,ನಿಯತ್ತಿನ ನಾಯಿ, ನಾಯಿಬುದ್ದಿ, ಎಂದೆಲ್ಲಾ ಶಬ್ಧಗಳು ಕರ್ಣಪಟಲದ ಮೇಲೆ ಬಿದ್ದೊಡನೆಯೆ ಇವರ ನೆನಪುಗಳು ಫಕ್ಕನೆ ಸಿಡಿದೇಳುತ್ತದೆ. ದಿನವೂ ಒಂದಲ್ಲ ಒಂದು ವಿಷಯಕ್ಕೆ ಇವರು ಎಲ್ಲರ ಬಾಯಲ್ಲೂ ಬರಲೇಬೇಕು ಹಾಗಿದೆ ಇವರ ಮಹಿಮೆ. ಹರಿಕಥೆ ದಾಸರ ಬಾಯಲ್ಲಿ ದತ್ತಾತ್ರೇಯರ ವಾಹನವಾಗಿ ಹೊಗಳಿಸಿಕೊಳ್ಳುವದರಿಂದ ಹಿಡಿದು ರಾತ್ರಿ ಕುಡುಕರ ಬಾಯಲ್ಲಿ ಇನ್ನೊಬ್ಬರ ಜನ್ಮ ಜಾಲಾಡಿಸಲು ಬಳಕೆಯಾಗುವವರೆಗೂ ಇವರು ತಮ್ಮ ಪ್ರಭಾವಲಯವನ್ನು ಸೃಷ್ಟಿಸಿಕೊಂಡಿದ್ದಾರೆ.

ಎಸೆದಿದ್ದೆಲ್ಲಾ ಮೂಸಿನೋಡಿ ಇಷ್ಟವಾದರೆ ಮಾತ್ರ ಕಚ್ಚಿ ತಿನ್ನುವ ಇವರ ಜಗತ್ತು ತುಂಬಾ ಕುತೂಹಲ. ದಾರಿಯಲ್ಲಿ ನಡೆವ ಜನರಿಗೆ ಅವರವರ ಭಾವನೆಗಳಿಗೆ ತಕ್ಕಂತೆ ಕಾಣಿಸುವ ಈ ಜೀವಿಗಳು ಉಪದ್ರವಿಗಳು, ನಿರುಪದ್ರವಿಗಳು ಎಂದೆಲ್ಲಾ ಉಪಮಾನಗಳಿಗೆ ಭಾಜನರಾಗುತ್ತಾರೆ. ಹೆದರುವವರಿಗೆ ಹಿಂಬಾಲಿಸಿ ಹೆದರಿಸುತ್ತಾ, ಹೆದರಿಸಿದರೆ ಕುಇಗುಡುತ್ತ ಕಣ್ಮರೆಯಾಗುವ ಪ್ರತಿ ಊರಿನ ಈ ದಾದಾಗಳು ಅಧ್ಯಯನಯೋಗ್ಯ ಶೀಲರಾಗಿದ್ದಾರೆಂದರೆ ಅತಿಶಯೋಕ್ತಿಯಲ್ಲ. ಇಂತಿಪ್ಪ ಇವರಿಂದ ಉಪಕಾರ, ಅಪಕಾರ ಹೊಂದದವರೂ ತುಂಬಾ ಕಡಿಮೆ. ರಸ್ತೆಯಲ್ಲಿ ನಡೆಯುವಾಗಲೋ, ರಾತ್ರಿ ಮಲಗಿದಾಗ ಇವರ ಕೂಗಿಗೆ ನಿದ್ರೆ ಬಾರದೆಲೋ, ಪರಿತಪಿಸುವವರು, ಶಪಿಸುವವರು, ಎಲ್ಲ ಕಡೆಯೂ ಸಿಗುತ್ತಾರೆ. ಹಗಲು ಕಂಡೋಡನೆ ಬಾಲ ಅಲ್ಲಾಡಿಸಿ ತಿಂಡಿಗಿಟ್ಟಿಸುವ ಇವರು, ರಾತ್ರಿಯಾಗುತ್ತಲೆ ಎಲ್ಲರನ್ನೂ ಕಳ್ಳರೆಂದೆ ಭಾವಿಸಿ ಬೆನ್ನುಬೀಳುವದು ಇವರ ಕರ್ತವ್ಯವೆಂದೇ ಭಾವಿಸಿ, ಶಿರಸಾ ಪಾಲಿಸುತ್ತಾರೆ. ಇವರ ವಾಸಸ್ಥಳಗಳೂ ಇವರಂತೆ ವಿಚಿತ್ರವಾಗಿ ಇರುತ್ತದೆ. ಮನೆಗಳ ಆವರಣದ ಗೋಡೆ ಬದಿ, ಮರಳು ರಾಶಿ, ಮನೆಯ ಹೊರಬಾಗಿಲ ಮುಂಬಾಗ, ರಸ್ತೆಯ ಬದಿ, ರಸ್ತೆ ಕೊನೆ ಹೀಗೆ ಎಲ್ಲೆಂದರಲ್ಲಿ ವಾಸಿಸಿ, ಗಬ್ಬು ನಾತ ಬರುತ್ತಲೇ ವಾಸಸ್ತಾನವನ್ನು ಬದಲಿಸುವ ಚಾಕಚಕ್ಯತೆ ಹುಟ್ಟಿನಿಂದಲೂ ಇವರಿಗೆ ಕರಗತವಾಗಿದೆ. ಆವರು ನಿಂತ, ಕುಂತ, ಮಲಗಿದ ಜಾಗಗಳೆಲ್ಲ ಅವರ ಸ್ವಂತದ್ದಾಗಿ, ಮತ್ಯಾರದರೂ ಆಕ್ರಮಣ ಮಾಡಲು ಮುಂದಾದರೆ ಅವರಿಗೆ ಎಚ್ಚರಿಕೆ ಕೊಡುವ ಪದ್ದತಿ ಇವರಲ್ಲಿದೆ. ಊರಿನ ಕಂಬಗಳು, ಗಿಡಗಂಟಿಗಳು, ಮರಗಳು ಸ್ವಂತದೆಂಬಂತೆ ಗುರುತುಮಾಡುವ ಕಲೆಯನ್ನು ತಲತಲಾಂತರದಿಂದ ಇವರು ಸಿದ್ದಿಸಿಕೊಂಡಿದ್ದಾರೆ. ತಮ್ಮದೆ ಆದ ಪಡೆಯನ್ನು ಕಟ್ಟಿಕೊಂಡು ತಮ್ಮ ಕ್ಷೇತ್ರಗಳಲ್ಲೆಲ್ಲಾ ಗಸ್ತು ತಿರುಗುತ್ತ ತಮ್ಮ ಸಾಮ್ರಾಜ್ಯವನ್ನು ಪರರ ಆಕ್ರಮಣದಿಂದ ಇವರು ರಕ್ಷಿಸಿಕೊಳ್ಳುತ್ತಾರೆ.

ಇವರ ಬಗ್ಗೆ ಅತೀವ ಆಕರ್ಷಣೆಯೇ ನನಗೆ ಹಲವಾರು ಪಾಠಗಳನ್ನು, ಅನುಭವಗಳನ್ನೂ ನೀಡಿದೆ. ಬೀದಿಯಲ್ಲಿ ಅಮ್ಮನೊಡನೆ ಒಡಾಡಿಕೊಂಡಿದ್ದ ಇವರನ್ನು ಪ್ರೀತಿಯಿಂದ ಮನೆಗೆ ತಂದರೆ, ನನ್ನನ್ನು ಬಹಳ ತೊಂದರೆಗೆ ನೂಕುತ್ತಿದ್ದರು. ಕೊಟ್ಟದ್ದು ತಿನ್ನದೆ ಒಳಗೆ ಕೂಡಿಟ್ಟಿದ್ದನ್ನು ತಿಂದು, ಅಲ್ಲಿ ಇಲ್ಲಿ, ಹೇಸಿಗೆ ಮಾಡಿ, ದೊಡ್ಡವರಿಂದ ತಾವು ಬಡಿಸಿ ಕೊಳ್ಳುವದಲ್ಲದೆ ನನಗೂ ಸರಿಸಮನಾದ ಪಾಲು ಸಿಗುವಂತೆ ಮಾಡುತ್ತಿದ್ದರು. ಒಮ್ಮೆಮ್ಮೆ ತಿನ್ನುವದಕ್ಕೆ ಏನು ಸಿಗದಿದ್ದರೆ ಹೊರಗಿಟ್ಟ ಚಪ್ಪಲಿ, ಬಟ್ಟೆಗಳನ್ನೆ ಹರಿದು ತಮ್ಮ ಸಾತ್ವಿಕ ಕೋಪವನ್ನು ಪ್ರದರ್ಶಿಸುತ್ತಿದ್ದರು. ತಮಗೆಂದೇ ಇಟ್ಟ ಗೋಣಿಚೀಲದಲಿ ಮಲಗದೆ, ಜಗುಲಿಯಲ್ಲಿ ಮಲಗಿರುವವರ ಹಾಸಿಗೆಯಲ್ಲಿ, ಕತ್ತಲಲ್ಲಿ ನಿಧಾನವಾಗಿ ಸೇರಿ ರಾಜರ‍ಂತೆ ನಿದ್ರಿಸುತ್ತಿದ್ದರು. ಹೀಗೆ ಅತಿ ಸುಂದರವಾಗಿ ಬೆಳೆದು ಯೌವನ ಪ್ರಾಪ್ತಿಯಾಗುತ್ತಲೆ ಸಂಗಾತಿ ಹುಡುಕಿಕೊಂಡು ಮನೆ ಬಿಟ್ಟರೆ ವಾರ‍ ಹದಿನೈದು ದಿನಕ್ಕೊಮ್ಮೆ ದರ್ಶನವನ್ನು ಕೊಡುತ್ತಿದರು. ಹೀಗೆ ಒಮ್ಮೆಮ್ಮೆ ಬಂದವರು ತಮ್ಮ ಸಂಗಡಿಗರೆನ್ನಲ್ಲಾ ಕರೆದು ದೋಂಬಿ ಮಾಡಿ ಮನೆಯವರ ಧರ್ಮದೇಟಿಗೆ ಮತ್ತೆ ಮನೆ ಬಿಡುತ್ತಿದ್ದರು. ಹೀಗೆ ಇವರು ಮನೆ ಕಡೆ ಬರುವದು ಕಡಿಮೆಯಾದ ಮೇಲೆ ಮತ್ತೆ ಬೇರೊಬ್ಬರನ್ನು ಹುಡುಕಿ ತಂದಿಟ್ಟುಕೊಳ್ಳುವದು ನಮಗೆ ಅನಿವಾರ್ಯವಾಗುತ್ತಿತ್ತು.

ಓಮ್ಮೆ ಇವರು ನಮ್ಮ ತರಗತಿಯೊಳಗೆ ಬಂದು ಅವಾಂತರ ಸೃಷ್ಟಿಸಿದ್ದನ್ನು ಮರೆಯಲಾಗುವುದಿಲ್ಲ. ಮಧ್ಯಾಹ್ನದ ಊಟ ಮಾಡಿಕೊಂಡು ಬಂದ ನಮ್ಮ ಜೊತೆ, ಇವರಲೊಬ್ಬರು ತರಗತಿ ಸೇರಿಕೊಂಡು ಹೊರ ಹೋಗುವ ಮನಸ್ಸು ಮಾಡದೆ ಅಲ್ಲೆ ಅಡಗಿ ಕುಳಿತುಕೊಂಡು ಬಿಟ್ಟರು. ಶಿಕ್ಷಕರು ಬಂದು ಭೂಗೋಳದ ವಿವಿಧ ಹವಾಗುಣಗಳನ್ನು ವರ್ಣಿಸಲು ಶುರುವಾಗಿ ಹತ್ತು ನಿಮಿಷ ಕಳೆಯುವದರ ಒಳಗೆ, ಅರ್ಧ ಕ್ಲಾಸು ಅರೆನಿದ್ರೆಯಲ್ಲಿ ಕನಸು ಕಾಣುತಿತ್ತು. ಉಳಿದವರು ತಮ್ಮದೆ ಆದ ಇನ್ನಿತರ ಚಟುವಟಿಕೆಗಳಲ್ಲಿ ಮಗ್ನರಾಗಿದ್ದರು. ನಮ್ಮ ಜೊತೆ ಒಳಬಂದು ಮಲಗಿಕೊಂಡವರಿಗೆ ಪಾಠ ಬೇಜಾರಾಯ್ತೆಂದು ಕಾಣುತ್ತದೆ. ಬೇಜಾರಾದರು ಸುಮ್ಮನೆ ಕೂತುಗೊಳ್ಳುವ ಜಾಯಮಾನದವರಲ್ಲ ಇವರು. ಸ್ವಲ್ಪ ಹೂತ್ತು ನೋಡಿ, ಆಮೇಲೆ ಇದ್ದಕ್ಕಿದ್ದಂತೆ ಮೇಲೆ ನೋಡುತ್ತಾ ದೊಡ್ಡದನಿಯಲ್ಲಿ ಶೃತಿಯ ಸಹಾಯವಿಲ್ಲದೆ ಸಂಗೀತದ ಆಲಾಪವನ್ನು ಪ್ರಾರಂಭಿಸಿದರು. ಇದ್ದಕ್ಕಿದ್ದಂತೆ ಸಮಾಜಶಾಸ್ತ್ರದಲ್ಲಿ ಆಲಾಪನೆಯ ಸದ್ದು ಕೇಳಿ ಎಚ್ಚರವಿದ್ದವರು ಸ್ವಲ್ಪಹೊತ್ತು ಆಚೀಚೆ ನೊಡಿ ತಡೆಯಲಾಗದೆ, ಕಿಸಕ್ಕನೆ ನಗೆಯನ್ನು ಹೊರಚೆಲ್ಲ ತೊಡಗಿದರು. ನಿದ್ರೆಯಲ್ಲಿದ್ದವರು ದಡಬಡಾಯಿಸಿ ಸಾವರಿಸಿಕೊಂಡು ಮಾಸ್ತರ್ ಯಾವುದೋ ಜೋಕ್ ಹೇಳಿರಬಹುದೆಂದು ಗೃಹಿಸಿ, ಗಹಗಹಿಸಿ ನಗತ್ತಾ ಆಮೇಲೆ ಕಣ್ಣಲ್ಲೆ ಪಕ್ಕದವರನ್ನು ವಿಚಾರಿಸತೊಡಗಿದರು. ಇದುವರೆಗೂ ಸಮಾಜದಲ್ಲಿ (ಕ್ಲಾಸಿನಲ್ಲಿ), ನಗುವದು ನಿಶಿದ್ದ ಎನ್ನುವಂತೆ ಪಾಠಮಾಡುತ್ತಿದ್ದ ಶಿಕ್ಷಕರು, ಇಂದೇನು ತಿಂದು ಬಂದಿರಬಹುದೆಂಬ ಶಂಕೆ ಹಲವರಲ್ಲಿ ಮೂಡತೊಡಗಿತು. ಹೆಣ್ಣು ಮಕ್ಕಳೆಡೆಗೆ ಗಮನ ಹರಿಸಿದ್ದ ಕೆಲವು ಹುಡುಗರು, ಅವರು ನಕ್ಕಿದ್ದು ನೋಡಿ, ನಗದಿದ್ದರೆ ದಡ್ದತನದ ಪ್ರದರ್ಶನವಾಗುವೆದೆಂದು ತಿಳಿದು ನಗೆಯನ್ನು ಇನ್ನೂ ಜೋರಾಗಿಸಿದರು. ತಮ್ಮಪಾಡಿಗೆ ಹವಾಗುಣವನ್ನು ವಿವರಿಸುತ್ತಿದ್ದ ಶಿಕ್ಷಕರು ಕ್ಲಾಸಿನ ಗಂಭೀರ ಹವಾ ಬದಲಾದದ್ದು ಕಂಡು, ಯಾವುದೋ ಹುಡುಗನ ಕಿತಾಪತಿಯೆಂದೇ ತಿಳಿದು ಸರಕ್ಕನೆ ಮೇಜಿನ ಮೇಲಿನ ಬೆತ್ತವನ್ನು ಕೈಗೆತ್ತಿಕೊಂಡರು. ಒಮ್ಮೆಲೇ ಶಿಕ್ಷಕರು ಬೆತ್ತ ಎತ್ತಿದ್ದು ನೋಡಿ, ಇದು ಮಾಸ್ತರ್ ಜೋಕ್ ಅಲ್ಲವೆಂದು ಫಕ್ಕನೆ ಗೃಹಿಸಿ ಬಾಯಿಮುಚ್ಚಿಕೊಂಡು ಬಿಟ್ಟರು. ಆದರೆ ಅಡಗಿಕೊಂಡಿದ್ದ ಮಹಾನುಭಾವರು ಮಾತ್ರ ತಮ್ಮ ಆಲಾಪನೆ ನಿಲ್ಲಿಸುವ ಮನಸು ಮಾಡಲಿಲ್ಲ. ಮಹಾನುಭಾವರ ಸಂಗೀತದ ಜ್ನಾನವಿದ್ದ ಕೆಲವರು, ಹುಶ್, ಹುಶ್ ಎಂದು ಕೂಗುತ್ತಾ ಶಬ್ಧಬಂದೆಡೆಗೆ ಹಣಕಿ, ಇಣುಕಿ ನೋಡಿದರು. ಶಿಕ್ಷಕರು ತಮ್ಮ ಅಪಾರ ಅನುಭವವನ್ನೆಲ್ಲಾ ಓರೆಗೆ ಹಚ್ಚಿ, ಇದು ಹೊರಗಡೆಯಿಂದ ಬಂದ ವಿದ್ವಾಂಸರದೆ ಎಂದು ಮನಗಂಡು ಶಾಂತಚಿತ್ತರಾದರು. ಆದರೂ ತಮ್ಮ ಸಮಾಜದ ಬಗೆಗಿನ (ಪಾಠದ) ಕರ್ತವ್ಯವನ್ನು ನೆನೆದು, ಉದ್ಭವಿಸಿದ ಸಮಸ್ಯೆಯನ್ನು ಪರಿಹರಿಸಲು, ಹಾವಿನ ಮೇಲೆ ಮಲಗಿದ ಮಹಾವಿಷ್ಣು, ರಾಕ್ಷಸರ ಸಂಹಾರಕ್ಕೆ ಭುವಿಗಿಳಿದಂತೆ, ಶಿಕ್ಷಕರು, ವಿಧ್ಯಾರ್ಥಿಗಳ ಜ್ನಾನದಾಹವನ್ನು ತಣಿಸಲು ತೊಂದರೆಯಿತ್ತ ಸಂಗೀತ ವಿದ್ವಾಂಸರ ಸಂಹಾರಕ್ಕೆ ಬೆತ್ತ ಹಿಡಿದು ಧಾವಿಸಿದರು. ಏಕಲವ್ಯನು ಸಾಧಿಸಿದ ಶಬ್ಧವೇಧಿ ವಿದ್ಯೆಯನ್ನೂ ನಾಚಿಸುವಂತೆ, ಶಬ್ಧ ಬಂದೆಡೆಗೆ ಹೋಗಿ ಬೆತ್ತ ಬೀಸಿದರು. ಇದುವರೆಗೂ ನಾದಸ್ವರಗಳನ್ನು ಏಕಾಗ್ರತೆಯಿಂದ ಹಾಡುತ್ತಿದ್ದ ವಿದ್ವಾಂಸರು ಅನಿರೀಕ್ಷಿತ ಆಕ್ರಮಣದಿಂದ ಒಮ್ಮೆಲೆ ದೇಹದ ಬಗ್ಗೆ ಪರಿವೆ ಹೊಂದಿ, ಪೆಟ್ಟು ತಾಗಿವದರೊಳಗೆ, ಕುಯಕ್ ಎಂದು ಶಬ್ಧ ಹೊರಡಿಸಿ ಕ್ಲಾಸಿನ ಹುಡುಗಿಯರೆಡೆಗೆ ನೆಗೆದು ಬಿಟ್ಟರು. ತಮ್ಮ ಬೆತ್ತಕೆ ಸಿಗದೆ ತಪ್ಪಿಸಿಕೊಂಡಿದ್ದು ನೋಡಿ, ಮಹಾಭಾರತ ಯುದ್ದದಲ್ಲಿ ಕರ್ಣನಿಗೆ, ಅರ್ಜುನನಿಗೆ ಬಿಟ್ಟ ಸರ್ಪಾಸ್ತ್ರ ತಪ್ಪಿಹೋದಾಗ, ಆದಷ್ಟು ನಿರಾಸೆಯಾಯಿತು. ಆದರೂ ಧೃತಿಗೆಡದೆ ಮುನ್ನುಗ್ಗಿ ಮತ್ತೊಮ್ಮೆ ಬಾರಿಸಲು ಹೋದ ಶಿಕ್ಷಕರ ಬೆತ್ತ ಡೆಸ್ಕಿನ ಕಾಲುಗಳಿಗೆ ತಾಗಿ ಲಟಕ್ಕನೆ ಮುರಿದು ಬಿತ್ತು. ರಥ ಮುರಿದರೂ ಅಭಿಮನ್ಯು ನೆಲದಲಿ ನಿಂತು ರಥದ ಚಕ್ರದಲಿ ಹೋರಾಡಿದ ಹಾಗೆ, ಶಿಕ್ಷಕರು ಕೈಯಲ್ಲಿ ಉಳಿದ ಬೆತ್ತವನ್ನ್ನು ಝಳಪಿಸುತ್ತಾ ವಿದ್ವಾಂಸರೆಡೆಗೆ ಏರಿ ಹೋದರು. ಹುಡುಗಿಯರೆಡೆಗೆ ಧಾವಿಸಿದ್ದ ಮಹಾನುಭಾವರು ಅಲ್ಲಿಯೂ ತಮ್ಮ ದೇಹ ಪ್ರತಾಪ ತೋರಿಸಿ ಅವರು ಜೋರಾಗಿ ಕಿರುಚುವಂತೆ ಮಾಡಿಬಿಟ್ಟರು. ಇದುವರೆಗೂ ಸುಮ್ಮನೆ ಶಿಕ್ಷಕರ ಶೌರ್ಯ ಪ್ರದರ್ಶನವನ್ನು ನೋಡುತ್ತಿದ್ದ ಕೆಲ ಹುಡುಗರು, ಹುಡುಗಿಯರು ಕಿರುಚಿದೊಡನೆ, ಮಲ್ಲಯುದ್ಧದಲಿ ಗೆದ್ದು ರಾಜಕುಮಾರಿಯ ವರಿಸಲು ಸಜ್ಜಾದ ರಾಜಕುಮಾರರಂತೆ ಯುದ್ಧೋನ್ಮಾದದಿಂದ ವಿದ್ವಾಂಸರೆಡೆಗೆ ಧಾವಿಸಿದರು. ಒಮ್ಮೆಲೇ ಶತ್ರುಗಳು, ರಕ್ತಬೀಜಾಸುರನ ಸೈನ್ಯದಂತೆ ಇಮ್ಮಡಿ, ಮುಮ್ಮಡಿಯಾಗಿದ್ದು ಕಂಡು, ಇದುವರೆಗೂ ಗರುಡಧ್ವಜದಂತೆ ಮೇಲೆ ಹಾರುತ್ತಿದ್ದ ವಿದ್ವಾಂಸರ ಬಾಲ, ಮುದುಡಿ ಹಿಂಗಾಲುಗಳ ಸಂದಿ ಸೇರಿತು. ಆದರೂ ಪ್ರಯತ್ನ ಬಿಡದೆ, ಧೂರ್ಯೋದನ ಅಡಗಲು ಸರೋವರದ ನೀರನ್ನು ಅಶ್ರಯಿಸದಂತೆ, ಇವರು ಹುಡುಗಿಯರ ಡೆಸ್ಕಿನ ಕೆಳಗೆ ಸೇರಿದರು. ಹುಡುಗಿಯರ ಚೀರಾಟ, ನೂಕಾಟದಿಂದ ಉತ್ತೇಜಿತರಾದ ಶಿಕ್ಷಕರು ಛಲ ಬಿಡದೆ ಸೈನ್ಯದೊಡನೆ ಮುನ್ನುಗ್ಗಿ ವಿದ್ವಾಂಸರನ್ನು ಹುಡುಕಿ, ಹುಡುಕಿ, ಶಸ್ತ್ರ ಬೀಸತೊಡಗಿದರು. ವಿದ್ವಾಂಸರು ನಾಜೂಕಾಗಿ ಎಲ್ಲ ಶಸ್ತ್ರಗಳಿಂದ ತಪ್ಪಿಸಿಕೊಳ್ಳುತ್ತ, ಒಂದು ಡೆಸ್ಕಿನ ಆಡಿಯಿಂದ ಇನ್ನೊಂದಕ್ಕೆ ನಡೆಯುತ್ತಾ ಹುಡುಗಿಯರಲ್ಲಿ ಮತ್ತಷ್ಟು ಭಯಹುಟ್ಟಿಸಿ ಅವರ ಆಕ್ರಂದನದ ಕೂಗು ಇಡೀ ಶಾಲೆಯನ್ನು ಸುತ್ತುವರಿದು ಮುಖ್ಯಶಿಕ್ಷಕರ ಕಿವಿಯವರೆಗೂ ಮುಟ್ಟಿವ ಹಾಗೆ ಮಾಡಿದರು.ಹುಡುಗರೆಷ್ಟೇ ಕೂಗಿದರು ಮಧ್ಯಾಹ್ನದ ನಿದ್ರಾದೇವಿಯ ಅಪ್ಪುಗೆಯಿಂದ ಹೊರಬಾರದಿದ್ದ ಮುಖ್ಯಶಿಕ್ಷಕರು, ದ್ರೌಪದಿಯ ಕೂಗಿಗೆ ಶ್ರೀಕೃಷ್ಣ ದ್ವಾರಕೆಯಿಂದ ಬಂದಹಾಗೆ, ಈ ಹುಡುಗಿಯರ ಕೂಗಿಗೆ ಕ್ಲಾಸಿನಬಾಗಿಲಲ್ಲಿ ಪ್ರತ್ಯಕ್ಷರಾಗಿ ಬಿಟ್ಟರು. ವಿದ್ವಾಂಸರು ಹಾಗು ಶಿಕ್ಷಕರ ಸೈನ್ಯದ ರಾಜಿಸೂತ್ರವಾಗಿ, ಮುಖ್ಯರು ವಿದ್ವಾಂಸರನ್ನು ಗೌರವವಾಗಿ ಹೊರಹೋಗಲು ಅನುವಾಗುವಂತೆ, ಸೈನ್ಯವನ್ನು ಹಿಂಬದಿಗೆ ಅಟ್ಟಿ, ಬಾಗಿಲನ್ನು ಮುಕ್ತಗೊಳಿಸಿ, ಶಸ್ತ್ರ ಝಳಪಿಸುವಂತೆ ಸೂಚಿಸಿದರು. ಹೀಗೆ ಬೇರೆಲ್ಲೂ ದಾರಿಕಾಣದೆ ವಿದ್ವಾಂಸರು, ಮುಖ್ಯರಿಗೆ ಒಂದು ಕೃತಜ್ನತೆಯನ್ನೂ ಹೇಳದೆ, ಮುಖವನ್ನು ಸಹ ತೋರದೆ, ಬೀಸೊದೊಣ್ಣೆಯಿಂದ ತಪ್ಪಿದರೆ ಜೀವನಪೂರ್ತಿ ಎಲ್ಲಿಯದರೂ ಬಿದ್ದಿದ್ದು ಅಥವಾ ಕದ್ದು ತಿನ್ನಬಹುದೆಂದು ಸುತ್ತಮುತ್ತ ನೋಡದೆ ಕಣ್ಮರೆಯಾದರು.

ಬಾಲ್ಯವನೆಲ್ಲಾ ಮುಗಿಸಿ ಯೌವನಬಂದರೂ ಇವರ ಬಗೆಗಿನ ನನ್ನ ಪ್ರೀತಿ ಸ್ವಲ್ಪವೂ ಕಡಿಮೆಯಾಗಲಿಲ್ಲ. ಒಮ್ಮೆಮ್ಮೆ ನನ್ನ ವಯಸ್ಸಿನ ಹುಡುಗಿಯರೆಲ್ಲ ಇವರನ್ನು ಮುದ್ದಾಡುತ್ತಿರುವಾಗ ಸ್ವಲ್ಪ ಈರ್ಷ್ಯೆ ಬಂದಿದ್ದಿದೆ. ಆದರೆ ಅವರನ್ನು ಮನೆಗೆ ಸೇರಿಸದೆ ಮತ್ತೆ ಬೀದಿಯಲ್ಲೆ ಬಿಟ್ಟಾಗ, ಹುಡುಗಿಯರ ಪ್ರೀತಿಯ ಬಗೆಗೆ ಪಾಠ ಕಲಿತಂತೆ ಭಾಸವಾಗಿದೆ. ಅವರ ಪ್ರೀತಿಯ ನೆನೆದು ಬೀದಿ ತುಂಬಾ ರಾತ್ರಿಯಲ್ಲಾ ನಿದ್ರೆ ಬರದೆ ವಿರಹಿಗಳಂತೆ ಪ್ರಲಾಪಿಸುತ್ತಾ ,ಇವರು ಬೀದಿ ಸುತ್ತುವದನ್ನು ನೋಡಿ ಮರುಕ ಪಟ್ಟಿದ್ದೇನೆ. ಹುಡುಗಿ ಕೈಕೊಟ್ಟರೆ ನಾಯಿಬಾಳು, ಬಾಲೆಯ ಪ್ರೀತಿ ಬಾಳಿಗೆ ಫಚೀತಿ, ಎಂಬೆಲ್ಲಾ ಹೊಸಗಾದೆ ನನ್ನಲ್ಲಿ ಉದ್ಭವಿಸಿ ಹುಡುಗಿಯರ ಬಗ್ಗೆ ಅತಿ ಎಚ್ಚರದಿಂದ ಇರುವಂತೆ ಪ್ರೇರೇಪಿಸಿದ್ದಾರೆ. ನಡುಬೀದಿಯಲ್ಲಿ ಬೇಕಾದರೂ, ತಮ್ಮ ಚಾಕಚಕ್ಯತೆಯನ್ನು ತೋರಿಸಿ ಹುಡುಗರಿಗೆ, ಯುವಕರಿಗೆ, ಉಚಿತ ಲೈಂಗಿಕ ಶಿಕ್ಷಣದ ಪಾಠವನ್ನು ತಕ್ಕಮಟ್ಟಿಗೆ ಕಲಿಸುತ್ತಾ ಗುರುವಾಗಿದ್ದಾರೆ. ಇಷ್ಟೊಂದು ಪಾಠ ಕಲಿಸುವ ಗುರುವಾದರು, ಎಷ್ಟೊಂದು ಕಷ್ಟ ನಷ್ಟಗಳನ್ನು ಅನುಭವಿಸಿದರು, ತುಂಬಿದ ಕೊಡ ತುಳುಕುವುದಿಲ್ಲ ಎನ್ನುವ ಹಾಗೆ ಒಂದಿಷ್ಟು ಹಮ್ಮು ಬಿಮ್ಮು ಇಲ್ಲದೆ, ತಮ್ಮ ಎಂದಿನ ದೈನ್ಯ ಮುಖವನ್ನು ಹೊತ್ತು ಊಟ ತಿಂಡಿಯ ಸಮಯಕ್ಕೆ ಸರಿಯಾಗಿ ಮನೆ ಮುಂದೆ ಹಾಜಾರಾಗಿ ಸಮಯ ಪಾಲನೆಯ ಮಹತ್ವವನ್ನೂ ನಮಗೆ ತಿಳಿಸುತ್ತಾರೆ. ನಂಬಿಕೆಗೆ ಅನ್ವರ್ಥವಾಗಿರುವ ತಮ್ಮ ಗುಣವನ್ನು ಹೆಸರನ್ನು ತಲತಲಾಂತರದಿಂದ ಉಳಿಸಿಕೊಂಡು ಬಂದಿರುವ ಇವರು , ಇಂದಿನ ರಾಜಕಾರಣಿಗಳ ಯುಗದಲ್ಲೂ ಇದನ್ನು ಉಳಿಸಿ ಬೆಳೆಸಿಕೊಂಡು ಹೊಗುತ್ತಿರವದು ನಮ್ಮ ಪೂರ್ವಪುಣ್ಯದ ಫಲವೇ ಇರಬಹುದು.

ಇವರ ಬಗ್ಗೆ ನನ್ನ ಗೌರವ ಇನ್ನೂ ಹೆಚ್ಚಾದದ್ದು ನನ್ನ ಮದುವೆಯ ನಂತರ ಎನ್ನಬಹುದು. ಮದುವೆಯಾಗಿ ಮೂರ್ನಾಲ್ಕು ತಿಂಗಳು ಕಳೆದಿರಬಹುದಷ್ಟೆ. ನನ್ನ ಹೆಂಡತಿಗೆ ಮನೆಯಲ್ಲಿ ಬೇಜಾರಾಗುವ ಕಾರಣ ವಾಯುವಿಹಾರವೆನ್ನುತ್ತಾ ಹೊರಗೆ ಅಡ್ಡಾಡುವದನ್ನು ರೂಢಿಸಿಕೊಂಡಿದ್ದಳು. ತನ್ನ ತತ್ಸಮಾನವಾಗಿ ಬೇರೆಯವರ ಬಗ್ಗೆ ವಿಶ್ಲೇಷಿಸುವ ಸದ್ಗುಣ ಹೊಂದಿದ ಕೆಲವು ಸ್ನೇಹಿತೆಯರ ಜೊತೆ ಹೋಗಿಬರುತ್ತಿದ್ದ ಇವಳು, ಅದೊಂದು ದಿನ ಅವರೆನ್ನೆಲ್ಲಾ ಬಿಟ್ಟು ನನ್ನನ್ನು ಜೊತೆಗೆ ಕರೆದೊಯ್ಯುಲು ತೀರ್ಮಾನಿಸಿದಳು. ಅವಳು ತಿರ್ಮಾನಿಸಿದ್ದರಿಂದ ಆ ದಿನ ಅವಳ ಜೊತೆ ಹೋಗುವದು ಅನಿವಾರ್ಯವಾಯಿತು. ನಡೆಯುತ್ತ ನಾವು ಹೀಗೆ ಸ್ವಲ್ಪ ದೂರ ಹೋಗುವಷ್ಟರಲ್ಲಿ ಎರಡು ಅಡಿ ಅಂತರವನ್ನು ಕಾಯ್ದು ಕೊಂಡು ಬರುತ್ತಿದ್ದ ನನ್ನವಳು ಫಕ್ಕನೆ ಬಳಿ ಬಂದು ಕೈಹಿಡಿದು ಕೂಗಿಕೊಂಡಳು. ಅನಿರೀಕ್ಷಿತ ವಿದ್ಯಮಾನದಿಂದ ಅವಾಕ್ಕಾದ ನಾನು ಆವಳ ಭಯದ ಮುಖವನ್ನು ನೋಡಿ, ಸುತ್ತಮುತ್ತ ಅವಳಲ್ಲ್ಲಿ ಭಯೋತ್ಪಾದಿಸಿದವರನ್ನು ರೋಮಾಂಚಿತನಾಗಿ ಹುಡುಕತೊಡಗಿದೆ. ಇದುವರೆಗೂ ನನಗೆ ಸಾಧ್ಯವಾಗದ ಕೆಲಸವನ್ನು ಸಾಧಿಸಿ ತೋರಿಸಿದ ಆ ಸಿದ್ಧ ಪುರುಷರ ದರ್ಶನಕ್ಕೆ ನನ್ನ ಕಣ್ಗಳು, ಮನಸು ಕಾತರದಿಂದ ಹುಡುಕುತ್ತಿದ್ದವು. ಇವಳು ಹಚ್, ಹಚ್ ಎನ್ನುತ್ತ ನನ್ನನ್ನು ಮತ್ತೂ ಬಿಗಿಯಾಗಿ ಹಿಡಿದು ಸುತ್ತುವರಿಯತೊಡಗಿದಳು. ಅವಳ ಹಿಂದೆ ನೋಡಿದರೆ ಆ ಸಿದ್ದ ಪುರುಷರು ಇವರೆ. ಅದೂ ಇಬ್ಬರೂ. ನಮ್ಮ ತೀರಾ ಸಮೀಪಕ್ಕೆ ತಮ್ಮದೇನೋ ನಿಗೂಢ ಕಾರ್ಯಾಚರಣೆಯ ಉದ್ದೇಶಕ್ಕಾಗಿ ಬಂದುಬಿಟ್ಟಿದ್ದರು. ಅನತಿ ದೂರದಲ್ಲೆ ಸಿದ್ಧರ ದೊಡ್ಡ ತಂಡವೇ ಬೀಡುಬಿಟ್ಟು ನಮ್ಮನ್ನು, ಸಂನ್ಯಾಸಿಗಳು ಸಂಸಾರಿಗಳನ್ನು ನಿರ್ಲಿಪ್ತತೆಯ ಮುಖದಿಂದ ಕಿರುನಗೆ ಬೀರಿ ಗಮನಿಸುವಂತೆ ನೋಡುತ್ತಿದ್ದವು. ಸತಿ ಸಾವಿತ್ರಿಯು ಯಮನಿಂದ ತನ್ನ ಗಂಡನ ಪ್ರಾಣ ಕಾಪಾಡಿದಂತೆ, ಈ ಸಾಧುಸಿದ್ದರ ಪಟಾಲಂನಿಂದ ನನ್ನ ಸತಿಯನ್ನು ಕಾಪಾಡಿಕೊಳ್ಳುವ ಹೊಣೆಗಾರಿಕೆಯ ನನ್ನ ಮೇಲೆ ಬಿದ್ದಾಗಿತ್ತು. ಯಾವುದೆ ಕ್ಷಣದಲ್ಲಿ ಬೇಕಾದರೂ ಯಾವುದಕ್ಕಾದರೂ ಸಿದ್ದವಿದ್ದ, ಏಳೆಂಟು ಸಂಖ್ಯೆಯಲ್ಲಿದ್ದ ಸಿದ್ಧರ ಸೈನ್ಯದೊಡನೆ ಏಕಾಂಗಿಯಾಗಿ ಹೋರಾಡಬೇಕಾದ ಪರಿಸ್ಥಿತಿ. ಅದರಲ್ಲೂ ನನ್ನನ್ನೇ ನಂಬಿ ಬಂದ ಪತ್ನಿಯನ್ನು ಉಳಿಸಿಕೊಳ್ಳುವ ಹೋರಾಟ. ಪತ್ನಿಯ ಎದುರು ವೀರಾವೇಶ ಪ್ರದರ್ಶಿಸಲು ಸಿಗುವ ಅತಿವಿರಳ ಅವಕಾಶವನ್ನ್ನು ಯಥೇಚ್ಛವಾಗಿ ಬಳಸಿಕೊಳ್ಳಬೇಕೆಂದು ನಿರ್ಧರಿಸಿ ನಿಶ್ಯಸ್ತ್ರನಾಗಿದ್ದ ನಾನು ಆಯುಧವೇನಾದರೂ ಸಿಗಬಹುದೆಂದು ಅಕ್ಕಪಕ್ಕ ಹುಡುಕಾಡಿದೆ. ಯುದ್ದಕಾಲದಲ್ಲಿ ಶಸ್ತ್ರಹುಡುಕಿದ ನನಗೆ, ಎಲ್ಲಿಯೂ ಏನೂ ಸಿಗದಾಯಿತು. ಏನು ಮಾಡಬೇಕೆಂದು ತಿಳಿಯದ ನಾನು ಸುಮ್ಮನೆ ನಿಂತಿದ್ದು ನೋಡಿ ನನ್ನ ಸತಿ ಗಾಬರಿಯಾಗಿ ನನ್ನ ಕೈಹಿಡಿದುಕೊಂಡು ಪಲಾಯನದ ದಾರಿ ತೋರಲು ಹೊರಟಳು. ಆಗ ನಾನು, ಕೌರವ ಸೈನ್ಯಕ್ಕೆ ಹೆದರಿ ಓಡುತ್ತಿದ್ದ ಉತ್ತರಕುಮಾರನನ್ನು ಅರ್ಜುನನನು ಗಟ್ಟಿಯಾಗಿ ಹಿಡಿದು ನಿಲ್ಲಿಸಿದಂತೆ, ಇವಳನ್ನು ಹಿಡಿದು ಯುದ್ಧರಂಗಕ್ಕೆ ಬೆನ್ನು ತಿರುಗಿಸಿ ಓಡದೆ ಸುಮ್ಮನೆ ನಿಂತುಕೊಳ್ಳುವಂತೆ ಗದರಿದೆ. ಅದುವರೆಗೂ ನಾನು ಗದರಿದರೆ ಮಹಿಷಾಸುರನನ್ನು ಮರ್ದಿಸಿದ ಚಾಮುಂಡಿಯ ಅವತಾರ ತಾಳುತ್ತಿದ್ದ ಇವಳು ಈಗ್ಯಾಕೊ ಸುಮ್ಮನೆ ನನ್ನ ಹಿಂದೆ ಅವಿತು ನಿಂತುಕೊಂಡಳು. ಯುದ್ಧರಂಗದಲಿ ಶಸ್ತ್ರಾಸ್ತ್ರಗಳನ್ನು ಬಿಸುಟು ನಿಂತಂತೆ ನಿಂತಿದ್ದ ನಮ್ಮನ್ನು ತಪಾಸಿಸುವಂತೆ ಮೂಸಿನೋಡಿದ ಸಿದ್ಧರ ಕಟ್ಟಾಳುಗಳು, ಮತ್ತೊಂದೆಡೆಗೆ ಮತ್ತೇನೋ ಅನ್ವೇಷಣೆಗೆ ತೆರಳಿದರು. ಇದುವರೆಗೂ ಜೀವವನ್ನು ನನ್ನ ಕೈಯಲ್ಲಿಟ್ಟು ಅಡಗಿಕೊಂಡಿದ್ದ ಹೆಂಡತಿ, ಈಗ ಸ್ವಲ್ಪ ಧೈರ್ಯ ಬಂದು, ಮುಂದೆ ನಡೆದು ನನ್ನ ಕೈ ಬಿಟ್ಟಳು! ಹೀಗೆ ನನ್ನ ಆಪಾರ ಬುದ್ಧಿಶಕ್ತಿಯಿಂದ ಅವಳನ್ನು, ಆ ಸಿದ್ಧರ ಸೈನ್ಯದ ಆಕ್ರಮಣದಿಂದ ಕಾಪಾಡಿದವನಾಗಿಯೂ, ನಡುಬೀದಿಯಲ್ಲಿ ಹೆಂಡತಿಯನ್ನು ಗದರಿದ ಗಂಡನಾಗಿಯೂ, ರಕ್ತಪಾತಗಳಿಲ್ಲದೆ ಸಂಭಾವ್ಯ ಯುದ್ಧವನ್ನು ತಡೆದ ಶಾಂತಿದೂತನಾಗಿಯೂ, ನಾನು ಏಕಕಾಲದಲ್ಲಿ ಆ ದಿನ ವಿಜೃಂಬಿಸಿದೆ.

ನನಗೆ ದಿನವೂ ಇವರ ನೆನಪು ಒತ್ತರಿಸಿಕೊಂಡು ಬರಲು ಇನ್ನೂ ಒಂದು ಕಾರಣವಿದೆ. ನನ್ನ ಮೇಲಧಿಕಾರಿಗಳೊಬ್ಬರಿಗೆ ಇವರು ತುಂಬಾ ಹತ್ತಿರದ ಸಂಬಂಧಿಗಳೆಂದು ಕಾಣುತ್ತದೆ. ತಮ್ಮ ಸಂಬಂಧಿಕರಿಂದ ಸ್ಪೂರ್ತಿ ಪಡೆದ ಇವರು ನಮ್ಮ ಮೇಲೆ ವಿನಾಕಾರಣ ತಮ್ಮ ಉಗ್ರಪ್ರತಾಪವನ್ನು ತೋರುತ್ತಿರುತ್ತಾರೆ. ಬೆಳಿಗ್ಗೆ ಬಂದೊಡನೆ ಹಲ್ಲುಕಿರಿಯುವದರಿಂದ ಹಿಡಿದು ಸಂಜೆ ಕಾಲ್ಕಿತ್ತು ಓಡಿಹೋಗುವವರೆಗೂ ಇವರದು ಥೇಟ್ ಅದೇ ಶೈಲಿ! ಇವರು ಯಾವುದಾದರು ವಿಷಯವನ್ನು ಗುರ್ ಎನ್ನದೆ ಮಾತಾಡಿಬಿಟ್ಟರೆ ನಮ್ಮ ಕಛೇರಿಯ ಅದೆಷ್ಟೋ ಅಸಂತೃಪ್ತ ಆತ್ಮಗಳಿಗೆ ಮೋಕ್ಷ ಸಿಕ್ಕುವದು ಏಕದಂ ಗ್ಯಾರಂಟಿ ಎಂಬುದು ನಮ್ಮ ಕಛೇರಿಯಲ್ಲಿ ಮೊದಲಿಂದಲೂ ಸುತ್ತುತ್ತಿರುವ ಹೊಸಗಾದೆ. ಇವರು ಯಾವುದಾದರೂ ವಿಷಯಕ್ಕೆ ಒಳಕರೆಸಿ ಹೆಚ್ಚು ಕಚ್ಚಿದರೆಂದರೆ ಮರುದಿನದಿಂದ ಎರಡು ದಿವಸ ಅವರದು ರಜೆ ಎಂದೇ ಲೆಕ್ಕ. ಹೀಗಾಗಿ ಯಾರಾದರು ರಜೆ ಹಾಕಿದರೆ ಇವರಿಂದ ಕಚ್ಚಿಸಿಕೊಂಡು ಸುಧಾರಿಸಿ ಕೊಳ್ಳುತಿರಬಹುದೆಂದು ಅವರನ್ನು ದೂರವಾಣಿಯ ಮುಖಾಂತರ ವಿಚಾರಿಸಿಕೊಳ್ಳಲಾಗುತ್ತಿತ್ತು. ಇಂಥಹ ಉತ್ತಮ ಮೇಲಧಿಕಾರಿಗಳು, ಈಗೊಂದು ತಿಂಗಳ ಹಿಂದೆ ಎರಡು ದಿನ ರಜೆ ಹಾಕಿದ್ದರು. ಇಂಥಹ ಉತ್ತಮರಿಗೆ ಅದ್ಯಾವ ಪ್ರಾರಬ್ಧ ಕರ್ಮ ಈಗ ಅಂಟಿಕೊಂಡಿತೆಂದು ಕಚೇರಿಯ ಎಲ್ಲರಿಗೂ ಅನುಮಾನ ಸುಳಿಯುತ್ತಿತ್ತು. ಎರಡು ದಿನಗಳಾದ ಮೇಲೆ ಕುಂಟುತ್ತ ಬಂದ ಈ ಸಾಹೇಬರ ಆರೋಗ್ಯ ವಿಚಾರಿಸಲಾಗಿ, ಸಾಹೇಬರಿಗೆ ಅವರ ಸಂಬಂಧಿಗಳೇ ಆದ ಇವರೊಲ್ಲೊಬ್ಬರು ಅತೀ ಆತ್ಮೀಯವಾಗಿ ಕುಶಲೋಪರಿ ವಿಚಾರಿಸದರೆಂದು ತಿಳಿದು ಇಡೀ ಕಛೇರಿ ಮೌನವಾಗಿಯೇ ಸಂಭೃಮಿಸಿತು. ಆದರೂ ವಿಷಯ ಕೇಳಿ ಸಂತೃಪ್ತರಾಗದ ಕೆಲವರು ಪೂರ್ಣ ವೃತ್ತಾಂತಕ್ಕಾಗಿ ಬೇಡಿಕೆಯಿಟ್ಟು ಸಾಹೇಬರ ಸಹನೆ ಪರೀಕ್ಷಿಸ ಹೊರಟರು. ನಮ್ಮ ಸಾಹೇಬರು ಯಾವುದೋ ಕಾರ್ಯನಿಮಿತ್ತ ರಾತ್ರಿವೇಳೆ ಮನೆಮುಂದಿನ ರಸ್ತೆಯಲ್ಲಿ ನಡೆಯುತ್ತಿದ್ದಾಗ ಅವರ ಸಂಬಂಧಿಗಳಲ್ಲೊಬ್ಬರ ಬಾಲವನ್ನು ಅತೀ ಜಾಗರೂಕತೆಯಿಂದ ಮೆಟ್ಟಿಬಿಟ್ಟರು. ಆ ಸಂಬಂಧಿಗೆ ಇವರು ನಮ್ಮವರಲೊಬ್ಬರೇ ಎಂದು ತಿಳಿಯುವಷ್ಟರಲ್ಲಿ ಅವರ ಬಾಯಿಯಲ್ಲಿದ್ದ ಹಲ್ಲು ಇವರ ಕಾಲನ್ನು ಗಟ್ಟಿಯಾಗಿ ಹಿಡಿದುಬಿಟ್ಟಿತ್ತು. ಗುರ್ತುಸಿಗದೇ ಕಾಲಿಗೆ ಗುರ್ತಿಸಿದ ಪರಿಣಾಮವನ್ನೆದುರಿಸಿದರು. ಮೈಸೂರು ದಸರಾದ ಮುಷ್ಟಿಯುದ್ಧದಲ್ಲಿ ಜಗಜಟ್ಟಿಗಳು ರಪ್ ರಪ್ ಎಂದು ಕೈಬೀಸಿದಂತೆ ಬೀಸಿದ ಸಾಹೇಬರ ಹೊಡೆತಕ್ಕೆ ಸಂಬಂಧಿಕರು ಎದ್ದೆನೋ ಬಿದ್ದೆನೋ ಎಂದು ಬಾಲ ಎಲ್ಲಿದೆ ಎನ್ನುವದನ್ನೂ ಲಕ್ಷಿಸದೆ ಚೀರಾಡುತ್ತಾ ದೂರ ಓಡಿಹೋದರು. ಪಾಪ ಸಾಹೇಬರು, ಸಂಬಂಧಿಕರ ಪ್ರೀತಿಗೆ, ವೈದ್ಯರಿಗೆ ಬೆಲೆಕಟ್ಟಿ, ಆ ಸವಿನೆನಪನ್ನು ಮೆಲಕು ಹಾಕುತ್ತಾ ಎರಡು ದಿನ ಮನೆಯಲ್ಲೆ ಮಲಗಿಕೊಂಡಿದ್ದರು. ಅವರಿಗೆ ಸಂಬಂಧಿಕರೆ ಆದರೂ, ನಮಗೆಲ್ಲರಿಗೂ ಎರಡು ದಿನ ಆನಂದದಿಂದಿರುವಂತೆ ಅನುಗ್ರಹಿಸಿದಕ್ಕೆ ಎಲ್ಲರೂ ತುಂಬು ಹೃದಯದ ಕೃತಜ್ನತೆ ಸಲ್ಲಿಸಿದೆವು.

ಈಗ ನಾನು ನಿಮಗೆ ಇಷ್ಟೆಲ್ಲಾ ಕಚ್ಚಿದ್ದರ ಕಾರಣ ತಿಳಿಯುತ್ತಿರಬಹುದು! ಇಷ್ಟೆಲ್ಲಾ ಪ್ರೀತಿ, ಅನುಭವಗಳನ್ನು ಒಡಲ್ಲಲ್ಲಿಟ್ಟುಕೊಂಡು ಸುಮ್ಮನೆ ಇರುವುದು ಅಸಾಧ್ಯ! ಇವರ ಬಗ್ಗೆ ನನ್ನಲ್ಲಿ ಪ್ರೀತಿ, ಅಭಿಮಾನ, ದಿನೆ ದಿನೆ ಬೆಳೆಯುತ್ತಿರುವದನ್ನು ನೋಡಿದ ಮನೆಯವಳು, ಸ್ನೇಹಿತರೆಲ್ಲಾ ಈಗಾಗಲೆ ನನಗೆ ಒಳ್ಳೆ ಕಡೆ ತಕ್ಕವ್ಯವಸ್ತೆ ಮಾಡಲು ಹೊರ‍ಟಿದ್ದಕ್ಕೆ ನನಗೆ ಖೇದವಿದೆ. ಇವರ ಮಹಿಮೆಯನು ಹುಲುಮಾನವರೇನು ಅರಿವರು! ಲೋಕಕ್ಕೆಲ್ಲಾ ಹೆಂಡತಿಯನ್ನು ಅಡವಿಡಬಹುದೆಂದು ತೋರಿಸಿದ ಧರ್ಮರಾಯನಿಗೇ ಇವರು ಮೋಕ್ಷದ ದಾರಿ ತೋರಿಸಿದವರು. ನನ್ನಂತಹ ಇವರ ಕಟ್ಟಾ ಅಭಿಮಾನಿಗೆ ಇವರು ಮೋಕ್ಷದ ಹಾದಿ ತೋರಿಸುವದರಲ್ಲಿ ನನಗಂತು ಸಂಶಯವಿಲ್ಲ.

ಇಂಥ ಮಹಾನುಭಾವರ ಮಹಿಮೆಯ ಅರಿಯದ ಹುಲು ಮನುಜಗೆ ಇಲ್ಲಂತೂ ಸುಖವಿಲ್ಲ, ಅಲ್ಲೇನೋ ಗೊತ್ತಿಲ್ಲ!!

ಬದುಕ ಮತ್ತೆ ನೀಡಿ

2011-05-11T04:41:00.000-07:00

ಹಾರಿ ಹಾರಿ ದೂರ ಸರಿದ ಓ ನನ್ನ ಕನಸುಗಳೇ
ಬಾಚಿ ತಬ್ಬುವೆನು ತಿರುಗಿ ಬಂದುಬಿಡಿ
ಎದೆಯ ಗೂಡಲಿ ಮತ್ತೆ ಬೆಚ್ಚಗೆ ಮಲಗಿ
ಉತ್ಸಾಹದ ಬದುಕೆನಗೆ ಮತ್ತೆ ನೀಡಿ

ಭವ್ಯ ಬದುಕಿನ ಕನಸೆ, ಸುಖದ ಬಾಳಿನ ಬೆಳಕೆ
ಓ ಪ್ರೀತಿ ಮುತ್ತಿನ ಹಂಬಲವೇ, ಹಿತದ ಮಾತೆ,
ಬತ್ತದ ಮುಗುಳ್ನಗೆಯೇ, ನಿಂತಿದ್ದ ಕಾಲವೇ
ಎಲ್ಲ ಬನ್ನಿ,ಉತ್ಸಾಹದ ಬದುಕ ಮತ್ತೆ ನೀಡಿ

ತುಂಟತನದ ಬಾಲ್ಯದ ಮುಗ್ಧತೆ
ಚಿಗುರ ಮೀಸೆಯ ನವ ಅಪೇಕ್ಷೆ,
ಗೆಳತಿಯ ಜೊತೆ ಹಗಲಿರುಳು ಕೊರೆದ ಕತೆ
ಎಲ್ಲ ಬನ್ನಿ,ಉತ್ಸಾಹದ ಬದುಕ ಮತ್ತೆ ನೀಡಿ.

ಅರಿತೆ ನಿಮ್ಮ ಅಸ್ತಿತ್ವದ ಬೆಲೆ
ನಿಮ್ಮನೆಲ್ಲಾ ಕಳೆದ ಮೇಲೆ
ಮತ್ತೆ ಮತ್ತೆ ಬೇಕೆನ್ನುಸುತಿದೆ ಕನಸುಗಳೇ,
ದಯವಿಟ್ಟು ಬಂದು ಒಮ್ಮೆ ಆ ಬದುಕ ನೀಡಿ.

ರವಿ ಕಾಣನು!

2011-03-23T01:24:00.000-07:00

ಹೊತ್ತು ಮೂಡುತಲೆ ಬೆಳಕ ಬಂಧನದ ಸವಿ
ಮೈತ್ರೇಯನ ಮಧುರ ಎಳೆ ರಶ್ಮಿ
ನಿಂತಲ್ಲೆ ಮತ್ತೇರಿಸುವ ಮಂದ ಮಸುಕು
ತೆರೆ ಸರಿಸಿ ಅರಳ ಬಯಸುವ ದಿನದ ಬದುಕು
ಆವನೇನು ಈಗ ದಿನವೂ ಬರುತಿಹನೇ?

ಏಲ್ಲಿ ಅಲಿಸಿದರೂ ಯಾವ ಹಕ್ಕಿಯ ಕೂಗು ಕೇಳದು
ಬಿಡಾಡಿ ನಾಯಿಗಳ ಕರ್ಕಶ ಭೋರ್ಗರೆತ
ಕಿರ್ ಕಿರ್ ಶಬ್ಧ ಕಿವಿಯಲ್ಲೆಲ್ಲಾ
ತರೆಹೇವಾರಿ ಸದ್ದುಗಳು ಸುತ್ತಮುತ್ತೆಲ್ಲಾ
ಈ ಪ್ರಶಾಂತತೆಗೆ ರವಿ ಕರಗಿದನೇ?

ರವಿಕಿರಣಕೆ ಮೈಒಡ್ದುವ ಕೈದೋಟದ ಹೂವೆಲ್ಲಿ
ಬಾಲವನೆತ್ತಿ ಅಮ್ಮನ ಮೊಲೆಯುಣ್ಣುವ ಕರುವೆಲ್ಲಿ
ಹನಿಯಿಕ್ಕಿ ತಂಪೆರವ ಹಸಿರು ಮರಗಳೆಲ್ಲಿ
ಬರಿ ವಿಷಾದ, ಧನದ ಉನ್ಮಾದ,
ಎಲ್ಲೋ ಸಂತಸ ಹುಡುಕುವ ಯೋಚನೆ
ಭವ್ಯ ಬದುಕು ಕಟ್ಟುವ ಕಾಮನೆ

ಏಲ್ಲಿಯದೋ ಮೋಹಕತೆ, ಮೂಲೆ ಸೇರಿದ ಭಾವುಕತೆ,
ನಿನ್ನೆ ಅರ್ಧಕ್ಕೇ ನಿಲ್ಲಿಸಿದ ಯೋಚನೆಯ ಕಂತೆ,
ಬಿಟ್ಟು ಕಳುಹಿಸದೆ ಒಳಗೇ ಹಿಡಿದಿಟ್ಟ ಚಿಂತೆ
ಗೊಂಚಲುಗಳಾಗಿ ಮನಸು ಭಾರವಾಗಿದೆ
ಸೂರ್ಯರಶ್ಮಿಯೂ ಒಳಗಿಣುಕದಂತಾಗಿದೆ
ಮುಂಜಾನೆಯೇ, ಸೂರ್ಯನ ಹುಡುಕುವಂತಾಗಿದೆ.....

ವಿಷಮ ಘಳಿಗೆ

2011-01-19T03:43:00.000-08:00

ಮುನಿಸೆಂದು ಮುಸುಕಿನಲಿ,
ಮಲಗಿರುವ ಮಡದಿ,
ಎಬ್ಬಿಸುವ ಗೊಡವೆ ನನಗೇಕೆಂದೆ,
ಹಿಂಡುತಿಹ ಪ್ರೀತಿ,
ಭಾವನೆಗಳ ಹತ್ಯೆಯ ಭೀತಿ
ತಡೆಯದ ತಳಮಳ,
ಬಳಿ ನಡೆದೆ....

ಎಲ್ಲಿಯದೋ ಚಿಂತೆ,
ಯಾರದೋ ಕೋಪ,
ಕಳೆದ ತನ್ನತನ,
ದುಗುಡದ ಮನ,
ಏನು ವಿಷಯವೋ,
ಸಮಯ ವಿಷಮವೋ,
ಎಲ್ಲವೂ ಅರೆಕ್ಷಣದಲಿ,
ಸಮಯ ಜಾರಿದೆ.....

ಕೈಮೀರಿದ ಘಳಿಗೆ,
ಕಾಲವೇ ಹಾಗೆ,
ಮತಿ ಸ್ಥಗಿತ,
ಮಾತು ಅಪರಿಮಿತ,
ನಾನೇನೆಂದೆನೋ,
ಅವಳೇನೆಂದಳೋ
ಎಲ್ಲವೂ ಅಯೋಮಯ,
ನಾ ಸಂತೈಸಿದೆ...

ನನ್ನ ಸೋಲೊ, ಅವಳ ಗೆಲುವೋ
ಅಹಂ ಸತ್ತಿತೋ,
ಪ್ರೀತಿ ಗೆದ್ದಿತೋ,
ವೈಮನಸ್ಯ ಕಳೆಯಿತೋ,
ದಾಂಪತ್ಯ ಗೆದ್ದಿತೋ,
ಇಬ್ಬರಲೂ ಅಂಬರಕ್ಕೇರಿದ ಸಂತಸ
ಮಸುಕು ಕಳೆಯಿತು
ಮುಸುಕು ಸರಿಯಿತು....
ಅಂತೂ ಬಾಳ ಚಕ್ರ ಮುಂದೆ ಸಾಗಿತು...

ಇದುವೇ ಆಧುನಿಕತೆ!!

2011-01-01T00:08:00.000-08:00

ನವವರುಷವೆಂದು ನವೋಲ್ಲಾಸದ ಕೂಗು
ಮಸಣದೆಡೆ ನಡೆವಂತೆ ಮೆರವಣಿಗೆ,
ವಿಕಾರ ಚೀತ್ಕಾರ, ಹೆಂಡ ತುಂಡಿನ ಸತ್ಕಾರ
ಇದುವೇ ನವವರುಷದ ಸಂಭೃಮದ ಬಗೆ

ಕಣ್ಣುಕುಕ್ಕಿಸಿ ಝಗಮಗಿಸುವ ಬೆಳಕ ಚೆಲ್ಲಾಟ
ಗುನುಗುವ, ತೂರಾಡುವ, ಕುಡುಕರ ಓಡಾಟ
ಮತ್ತೇರಿ ಬಾಯ್ಬಡಿಯುತಿಹ ಕಾಮುಕರ ದಂಡು
ಹೆಂಗಸರು, ಗಂಡಸರು, ಇಲ್ಲೆಲ್ಲರೂ ಒಂದು!!

ಕುಡಿದರೇನೆ ಪ್ರಗತಿಯೆಂದು ಬೊಬ್ಬಿಡುವ ಜನರು
ಧರ್ಮವನು, ಮೌಲ್ಯವನು, ಬಿಟ್ಟವರೆಲ್ಲ ಪ್ರಗತಿಪರರು
ಸ್ವಂತಿಕೆಯಿಲ್ಲ, ಪರರ ನಂಬುವದಿಲ್ಲ
ತುಂಡುಡುಗೆ, ಹಾದರ, ಯಾವುದೂ ಅಸಭ್ಯವೇ ಅಲ್ಲ!!

ದೇಶ ಮುನ್ನಡೆಯಬೇಕು, ನಾವೂ ಸಾಧಿಸಬೇಕು,
ನಮಗಿತ್ತ ಸ್ವಾತಂತ್ರ್ಯವ ಅನುಭವಿಸಲೇಬೇಕು
ಇದುವೇ ಪ್ರಗತಿ, ಇದುವೇ ಆಧುನಿಕತೆ,
ಅನೈತಿಕತೆಯೇ ಮುಂದುವರಿವ ನಾಗರೀಕತೆ!!!

ಆಹಾ ಏನು ಚಳಿ!

2010-12-23T03:36:00.000-08:00

ಅಹಾ ಈದೇನು ಮೈ ಕೊರೆಯುವ ಚಳಿ
ಹಿಮಾಲಯದ ತಣ್ಣೀರ ಮೈಗೆರೆಚಿದ ಪರಿ
ತನುವೆಲ್ಲಾ ಗಡಗಡನೆ ನಡುಗುತಿದೆ
ಹಾಸಿಗೆಯಲ್ಲೇ ಮುದುಡಿ ಮಲಗುವಂತಾಗಿದೆ

ಬಾನಿಂದ ಭುವಿಗೆ ಬೀಳುತಿಹ ದಟ್ಟ ಮಂಜು
ಪಳಪಳ ಹೊಳೆವ ಕಿರಣಗಳ ಮೋಜು
ಚಿಟಿಪಿಟಿ ಜಿನುಗುತಿಹ ರಸ್ತೆಯಂಚಿನ ಮರ
ಓ ಚಳಿಯೇ, ಇದೆಲ್ಲ ನೀ ನಮಗಿತ್ತ ವರ.

ಸುಯ್ ಎನ್ನುತ ಬೀಸುತಿದೆ ನಿನ್ನ ಹೊತ್ತ ಗಾಳಿ
ಕೆರಳುತಿದೆ ಮನಸು ನಿನ್ನ ರೂಪವ ನೋಡಿ
ತಬ್ಬಿ ಏಕೆ ಪೀಡಿಸುತಿಹೆ ಬಿಡು ನನ್ನನ್ನು
ನಲ್ಲೆ ಬರುತಿಹಳು, ಹೋಗಿ, ನಾಳೆ ಬಾ ಇನ್ನು

ಏನು ವರ್ಣಿಸಲಿ ನಿನ್ನ ಓ ಚಳಿಯೆ ,
ಕಂಬಳಿಯ ನೆನಪ, ಪದೆಪದೆ ತರುತಿಹೆ,
ಬಿಸಿ ಏರಿಸುವ ಮನಸ ಮೂಡಿಸುತಿಹೆ,
ಪ್ರಿಯತಮೆಯ ಬಂಧನಕೆ ದಿನವೆಲ್ಲಾ ದೂಡುತಿಹೆ.

ಪ್ರಾರ್ಥಿಸುವೆ ಓ ಚಳಿಯೆ,ನೀ ನನ್ನ ಜೊತೆಗಿರು
ಕಾಲವನು ದಾಟಿ ನೀ ಎಲ್ಲು ಹೊಗದಿರು,
ಗೊಗರೆವೆ ನಾ ನಿನಗೆ, ನೀ ಅಭಯವ ನೀಡು,
ಓ ಚಳಿಯೇ ನೀ, ನಾ ಕರೆದಾಗ ಬಂದುಬಿಡು,

ಹೆಂಡತಿಯ ನಗುವ ಬಯಸಿ

2010-12-22T21:24:00.000-08:00

ಹೆಂಡತಿಗೆ ತುಸು ಮುನಿಸು ಮೂಡಲು
ತಕ್ಷಣ ಅದನು ಶಮನಗೊಳಿಸಲೇಕೆ,
ಮುದ್ದು ಮುಖದಲ್ಲೆಲ್ಲಾ ಕೆಂಪು ಆವರಿಸಲು
ಇಮ್ಮಡಿಸಿದ ಸೌಂದರ್ಯವ ಸವಿಯಬಾರದೇಕೆ

ಪ್ರೀತಿಯ ನೋಟಕೆ ಹೆಂಡತಿ ತುಸು ನಾಚಲು
ಮುಖ ಹಿಗ್ಗಿಸಿ ಬೀಗುವದೇಕೆ,
ನಾಚಿಕೆಯ ಮುಖಕ್ಕೆ ಕನ್ನಡಿಯ ತೋರಿ
ಕನ್ನಡಿಯನೇ ನಾಚಿಸಬಾರದೇಕೆ

ಹೆಂಡತಿ ಸುಮ್ಮನೆ ಗದರುತಲಿರಲು
ಮುಖವ ಗಂಟಿಕ್ಕಿ ಕೋಪಿಸುವದೇಕೆ
ಕೋಮಲ ಧ್ವನಿಯ ಇಂಪ ಆಲಿಸಿ
ಮುತ್ತುದುರುತೆಂದು ಕರೆದು ತೋರಬಾರದೇಕೆ

ಮನೆಗೆಲಸದಲಿ ಹೆಂಡತಿ ಸಹಾಯ ಬಯಸಲು
ತಾತ್ಸಾರದಲಿ ಅವಳನು ದೂರುವದೇಕೆ
ಸಹನೆಯಲಿ ಅವಳ ಮಾತನು ಪಾಲಸಿ
ಆಯಾಸವೆಂದು ಮಡಿಲಲಿ ಮಲಗಬಾರದೇಕೆ.

ಒಲವಿನ ಹೆಂಡತಿ ಮೌನವಾಗಿರಲು
ಏನಾಗಿ ಹೋಯ್ತೆಂದು ಹಳಹಳಿಸಲೇಕೆ
ನಮ್ಮ ದನಿಯನೂ ಮೌನವಾಗಿಸಿ
ಅವಳ ನೋವಿಗೆ ಸ್ಪಂದಿಸಬಾರದೇಕೆ.

ಹೇಗಿದ್ದರೂ, ಏನಿದ್ದರೂ, ಅವಳ ನಗುವ ಬಯಸಿ,
ಪ್ರತಿಕ್ಷಣವೂ ಅವಳ ಪ್ರೀತಿಸಬಾರದೇಕೆ.....

ಕನವರಿಕೆ

2010-12-16T22:18:00.001-08:00

ನೀನೆಂತ ಪ್ರೀತಿಯ ನೀಡುತಿಹೆಯೇ ಗೆಳತಿ
ಜಗ ಕಾಣದಾಗಿದೆ,
ಯೋಚನೆ ಬರಿದಾಗಿದೆ,
ಅದೇನು ನೀ ಪ್ರೀತಿಸುವ ರೀತಿ,
ಗುರಿಯ ದಾರಿ ಮಸುಕಾಗಿದೆ
ಜೀವ ತಂಪಾಗಿ ಹೋಗಿದೆ

ಮನವ ಬಿಚ್ಚಿದರಲ್ಲಿ, ಸಿಗುವುದೇ
ನಿನ್ನ ಯೋಚನೆಯ ಕಂತೆ,
ನಾಡಿಗಳೆಲೆಲ್ಲ ರಕ್ತ ಹರಿಯುವುದೇ
ನಿನ್ನ ಪ್ರೀತಿಯಾ ಜೊತೆ.
ತಾಳಲಾರೆನು ನಾನು,
ನಾ ಹೊಟ್ಟೆ ತುಂಬಿದ ಜೇನು,
ನಿನ್ನ ಪ್ರೀತಿಯ ಮಧುವಲಿ
ನಾ ಸಿಕ್ಕಿ ಹಾರದಾದೆನು.

ಕಳೆಯುವೆನೆಂದರೂ ನಾ ಹೇಗೆ
ಕಳೆಯಲಿ ಈ ಬಂಧವನು
ತೊರೆಯುವೆನೆನೆಂದರೂ ನಾ ಹೇಗೆ
ತೊರೆಯಲಿ ನನ್ನದೇ ಜೀವವನು
ಬಂಧಿಸಿದೆ, ನರಳಿಸಿದೆ,ಮೋಹವ ಬೆಳೆಸಿದೆ,
ಮುಳುಗಿಸಿದೆ, ತೇಲಿಸಿದೆ, ನನಗೂ
ಪ್ರೀತಿಯ ಸಾಗರದಲಿ ಈಜುವದ ಕಲಿಸಿದೆ.....
ನಾನ್ಯಾರೆಂಬುದೇ ನನಗೆ ಮರೆತು ಹೋಗಿದೆ....

ಪ್ರೀತಿ ಬೇಡುವ ಬಗೆ

2010-10-20T02:47:00.000-07:00

ಬೆಲೆಬಾಳುವ ಒಡವೆ ತೊಟ್ಟು
ಬಣ್ಣಬಣ್ಣದ ಮಾತುಕೊಟ್ಟು
ಪ್ರೀತಿಯನ್ನು ಬೇಡಿದರೆ
ಹುಡುಗಿ ಪ್ರೀತಿಸುವಳೇ!
ಪ್ರೀತಿಯಲ್ಲೇ ಮನಸನಿಟ್ಟು,
ಮುಗ್ಧ ಮನಸನ್ನಡವಿಟ್ಟು
ಒಲವಿನ ಭಿಕ್ಷೆ ಬೇಡಿದರೆ
ನಲ್ಲೆ ಒಲ್ಲೆ ಎನ್ನುವಳೇ!!

ಓ ಗುರುವೇ, ನಾ ಹೇಗೆ ಬಿಡಲಿ?

2010-10-19T02:11:00.000-07:00

ನಾ ಹೇಗೆ ಬಿಡಲಿ,
ಓ ಗುರುವೆ ನಿನ್ನ ಸ್ಮರಣೆಯನು!
ನನಗಿಲ್ಲ ಒಂದಿನಿತು ಕಷ್ಟಗಳ ಗೊಡವೆ,
ಮರೆಯದಲೆ, ಅನುದಿನವು ನೀ ಕಾಯುತಿರುವೆ.
ನನ್ನ ಮನದೊಳಗೆ ನಿನ್ನ ನೀ ಬಂಧಿಸಿ,
ಪ್ರೀತಿಯಲಿ ಅನುಕ್ಷಣವು ಕಾಡುತಿರುವೆ.!!

ಏಕೆ ತೋರುವೆ ಗುರುವೆ,
ಈ ಪರಿಯ ಕರುಣೆಯನು,!
ನನ್ನಲೇನು ನೀ ಭಕ್ತಿಯ ಕಂಡೆ,
ನಿಸ್ವಾರ್ಥ ಸೇವೆಯನು ನಾನೇನು ಮಾಡಿದೆ,
ಅಜ್ನಾನದಲಿ ಮುಳುಗಿರುವ ನನ್ನನೇಕೆ ಎಬ್ಬಿಸಿದೆ,
ಈ ಪರಿಯ ಕೃಪೆಗೆ ನನ್ನನೇ ಏಕೆ ಆರಿಸಿದೆ!!

ಹೇಳು ಓ ಗುರುವೇ,
ನೀ ನನಗೇಕೆ ಒಲಿದಿರುವೆ
ಅದೆಷ್ಟು ಮಮತೆ, ಅದೇನು ಕರುಣೆ,
ಕಳೆವೆ, ನನ್ನೆಲ್ಲಾ ಜೀವನದ ಬವಣೆ,
ಕರೆಯದೆಲೇ ನನ್ನೆಡೆಗೆ ಓಡೋಡಿ ಬರುವೆ,
ಸುಖದುಃಖದಲಿ ನನ್ನ ಜೊತೆಜೊತೆಗೆ ನಡೆವೆ,

ಓ ಗುರುವೇ,
ಮನಸೆಲ್ಲ ನಿನ್ನಲ್ಲೆ ನಿಂತಿಹುದು,
ಕೂತಲ್ಲಿ ನಿಂತಲ್ಲಿ ನಿನ್ನನ್ನೆ ಕಾಣುವದು,
ಕಿವಿಗಪ್ಪಳಿಸುವ ಶಬ್ಧವೆಲ್ಲಾ ನಿನ್ನದೆ ವಾಣಿ
ಮಾತಿಲ್ಲ ಕತೆಯಿಲ್ಲ ನಾನೀಗ ಧ್ಯಾನಸ್ಥ ಮೌನಿ,
ಓ ಗುರುವೆ ಈ ಪ್ರೀತಿಗೆ ನಾ ಸದಾ ಚಿರರುಣಿ

ಮರುಳಾಗದಿರಿ

2010-10-08T23:55:00.000-07:00

ಹುಡುಗರೇ ಮರುಳಾಗದಿರಿ,
ಹುಡುಗಿಯರ ಮಾದಕ ನಗೆಗೆ,
ಅವರ ಕೋಮಲ ಧ್ವನಿಗೆ!
ಅರಿತೂ ಮೋಸ ಹೋಗದಿರಿ,
ಇದು ಕಟುಕರ ಮೋಹದ ಹಾಗೆ,
ಬಲಿಗೆ ಕುರಿಯ ಕೊಬ್ಬಿಸುವ ಬಗೆ!!

ನಾಯಿಗಳೇ ಅರಚುವಿರೇಕೆ?

2010-09-28T04:41:00.000-07:00

ನಾಯಿಗಳೇ ಅರಚುವಿರೇಕೆ,
ನಮಗೆ ನಿದ್ದೆ ಬಾರದ ಹಾಗೆ.
ಯಾರು ಕಲಿಸಿದರೋ ನಿಮಗೆ,
ಸುಖ ನಿದ್ದೆ ಕೆಡಿಸುವ ಹೊಸ ಬಗೆ,

ದೂರದೆಲ್ಲಿಯದೋ ಶಬ್ಧಕೆ,
ಇಲ್ಲಿಂದಲೇ ಪ್ರತಿಧ್ವನಿ ಏಕೆ?
ಹೋಗಬಾರದೆ ಅಲ್ಲಿಗೇ,
ಇಲ್ಲಿಯೇ ಅಬ್ಬರಿಸಬೇಕೆ?

ಇದೇನು ದೇವರಿಗೆ ನಿಮ್ಮ ಪ್ರಾರ್ಥನೆಯೋ ?
ಸಂಗೀತದ ರಸಸಂಜೆಗೆ ರೂಢಿಯೋ,
ಹಸಿವಿನಿಂದ ಕಂಗೆಟ್ಟ ರೊದನೆಯೋ
ಸ್ವಚ್ಛಂದ ಬಾಳ ಭಿಕ್ಷೆಗೆ ಮೊರೆಯೋ ?

ಯಾಕೀ ಚೀತ್ಕಾರ, ನಮ್ಮೆಡೆಗೆ ತಿರಸ್ಕಾರ,
ನಾವೇನ ಮಾಡಿರಿವೆವು ನಿಮಗಪಕಾರ
ಅದೇಕೆ ನಮ್ಮ ಮೇಲೆ ಕೋಪ ಈ ಪರಿ,
ಸುಮ್ಮನಿರುವ ನಮಗೇಕೆ ತೊಂದರೆ ನೀಡುವಿರಿ?

ಎಂಥಾ ಸ್ನೇಹಿತರು!!

2010-09-24T03:26:00.000-07:00

ಆಗ,
ಏನು ಸ್ನೇಹ, ಎಂಥ ಛಂದ,
ಎನೇ ಬರಲಿ, ಬಿಡೆವು ಬಂಧ,
ನಾವೀರ್ವರು, ಜೀವದ ಗೆಳೆಯರು!
ಈಗ,
ಕ್ಷಣಕೊಂದು ಹೊಸ ವಿವಾದ
ನಿತ್ಯ ಜಗಳ, ಚೀರುನಾದ,
ಕಾರಣ ಇಬ್ಬರೂ, ಗಂಡ ಹೆಂಡಿರು!!

ಹುಡುಗಿಯರ ಗೆಳೆತನ!

2010-09-23T03:48:00.000-07:00

ಹುಡುಗಿಯರ ಜೊತೆ ಗೆಳೆತನವೆಂದರೆ,
ವಾರದ ಹಿಂದೆ ನುಣ್ಣಗಾಗಿಸಿದ ತಲೆ ಸವರಿದಂತೆ!
ಅರೆ ಮೊಳೆತ ಕೂದಲು ಕೈ ಚುಚ್ಚುತ್ತಿದ್ದರೆ,
ಸುಖವೆಂದು, ನೋವಲೂ ಮೈಮರೆಯುವಂತೆ!!

ಕೂಗು ಯಾಕೆ?

2010-09-22T04:26:00.000-07:00

ನನಗೂ ಬೇಕು, ಅವಗೂ ಬೇಕು,
ಮಂತ್ರಿಯಾಗಿ ಮಾಡಲೇ ಬೇಕು,
ಯಾಕೆ ಹೀಗೆ, ಇವರು ಕೂಗಿತಿಹರು?!
ಹೇಗೋ ಏನೋ, ಅರಮನೆಗೆ ಬಂದು,
ರಾಜನೇರೋ ಸಿಂಹಾಸನವ ಕಂಡು,
ನಾಯಿಗಳೇಕೆ ತಮ್ಮಲೇ ಕಚ್ಚಾಡುತಿಹವು?!!

ಹೆಂಡತಿಯೆಂದರೆ!

2010-09-21T21:48:00.000-07:00

ಹೆಂಡತಿಯೆಂದರೆ ಹೀಗೆನೆ,
ಮದುವೆಯವರೆಗೂ
ನಾಚಿಕೆ ಮೌನ.
ಆಮೇಲೆ,
ಬೆದರಿಸುವ ದುರ್ಗಾ ವಾಹನ!
ಅವಳ ಮಾತು ಎಂದರೆ ಹಾಗೇನೆ,
ಮದುವೆಯವರೆಗೂ
ಎಲ್ಲವೂ ಸುಂದರ ಕವನ.
ಆಮೇಲೆ,
ದಿನವೂ ಕಿವಿ ಕೊರೆಯುವ ಸಾಧನ!!

ಇವರೇಕೆ ಅರಿಯರು?

2010-09-21T00:36:00.000-07:00

ಮರುಳಾಗುವರು ಹಳ್ಳಿ ಹುಡುಗರು,
ನಗರದ ಹುಡುಗಿಯರ ಚೆಲುವಿಗೆ,
ಅವರ ಮಾದಕ ನಡೆ ನುಡಿಗೆ!
ಪಾಪ ಇವರೇಕೆ ಅರಿಯರು
ಇಲ್ಲಿ ಹುಡುಗರೆಂದರೆ, ಹುಡುಗಿಯರಿಗೆ,
ಮೋಜು ಕೊಡುವ ಮಂಗಗಳ ಹಾಗೆ!!

ದೇವ ಗಣೇಶ

2010-09-17T04:41:00.000-07:00

ದೇವನೆ ಬಾ ಎಂದು ಭಜಿಸುತಲಿರಲು
ಕಷ್ಟವ ಕಳೆಯಲು ಮೊರೆಯಿಡಿತಿರಲು
ನಗುತಲೆ ಬರುವನು ನಮ್ಮಯ ಗಣಪ
ಭುವಿಯನು ಬೆಳಗುವ ವೀರ ಪ್ರದೀಪ.

ಕೈಯಲಿ ಮೋದಕ, ಕೊರಳಲಿ ಮಾಲೆ,
ಬಣ್ಣ ಬಣ್ಣದ ಕಿರೀಟ, ಶಿರದ ಮೇಲೆ,
ಬೃಹ್ಮಾಂಡ ಹೊಟ್ಟೆಗೆ ಹಾವಿನ ಬಂಧನ
ಇಲಿಯೇ ಇವನನು ಹೋರುವ ವಾಹನ.

ಚಕ್ಕುಲು ಕೋಡ್ಬಳೆ ಪಂಚಕಜ್ಜಾಯ
ತಿನ್ನಲು ಇವನಿಗೆ ಬಹಳ ಪ್ರಿಯ.
ಬಿಡದೆ ಬರುವನು ಭಾದ್ರಪದ ಚೌತಿಯಲಿ
ಪ್ರೀತಿ, ಭಕ್ತಿಯ ಬೆಳೆಸುವನೆಲ್ಲರಲಿ.

ಪ್ರಥಮ ವಂದಿತನು, ಕಷ್ಟವ ಕಳೆವನು,
ಎಲ್ಲರ ಮೆಚ್ಚಿನ ದೇವನು ಇವನು.
ಎಲ್ಲರ ರಂಜಿಸಿ, ಹೊಟ್ಟೆಯ ತುಂಬಿಸಿ,
ಸಲಹುವನೆಲ್ಲರ ಮುದದಲಿ ಹರಸಿ.

ಕೈಲಾಸ ವಾಸಿಯು, ಸುಂದರ ವದನನು,
ಗೌರಿಯ ಜೊತೆಗೂಡಿ ಓಡುತ ಬರುವನು.
ಎಲ್ಲರ ನೋಡಿ, ವರವನು ನೀಡಿ,
ನಗುತಲೆ ನಡೆವನು ನೀರಿನಡಿ.

---------------ಮಹಾ

ಹೂವಂತ ಹುಡುಗಿ

2010-09-15T22:24:00.001-07:00

ಹೂವಂತ ಹುಡುಗಿ ಎಂದು ಹೂವೊಂದ ಕೊಟ್ಟೆ,
ಕೈಯಲ್ಲಿ ಕೈಯ ಹಿಡಿದು ಪ್ರೇಮಕ್ಕೆ ಮೊರೆಯಿಟ್ಟೆ!
ಭಾವಕ್ಕೆ ಬೆಲೆಕೊಟ್ಟು ಪ್ರೀತಿಸುವ ಬದಲು
ರಾಖಿ ಕಟ್ಟಿ, ಹಣವ ನೀಡೆಂದಳು!!

ನಗರದ ಅನಾಗರಿಕರು

2010-09-08T05:10:00.000-07:00

ಅಬ್ಬಾ ಏನೀ ಸಂಚಾರ, ಏನೀ ದಟ್ಟಣೆ,
ಎಲ್ಲದಕೂ ಕಾರ‍ಣ ಇವರೆನೆ!
ಇವರಿಗಿಲ್ಲ ಒಂದಿನಿತು ಕಾಯುವ ಸಹನೆ,
ರಸ್ತೆಯೇ ಇವರಿಗೆಲ್ಲ,ಕಾರ್ಯಾಲಯ, ಮನೆ!!

ನಡೆಯುವರು ನುಗ್ಗುವರು ಅತ್ತಿತ್ತ ನೋಡದೆ,
ದಾರಿಯುದ್ದಕೂ ಕರ್ಕಶ ಶಬ್ಧವ ಮಾಡುವರು ಮರೆಯದೆ!
ನಿಯಮಗಳಾವುವು ಅನ್ವಿಯಸದು ಈ ಮಂದಿಗೆ,
ಗಮನವೆಂದೂ ಇರದು ದೀಪ ಸಂಜ್ನೆಗಳೆಡೆಗೆ!!

ಮೆರೆಯುವರು ದಾರಿಯಲಿ ಅನಾಗರಿಕರ ತೆರದಲಿ,
ಇನಿತೂ ಗೌರವದ ಮಾತಿಲ್ಲ, ಇವರ ನಿಘಂಟಿನಲಿ!
ಇವರೇನು ನಗರದಲಿ ನೆಲೆಸಿರುವ ನಾಗರಿಕರೋ,
ಅಥವಾ ರಸ್ತೆಯನೆಲ್ಲ ಕೊಂಡ ಪಾಳೆಗಾರರೋ?

ಹುಡುಗಿಯರ ಸಭ್ಯತೆ

2010-09-07T01:25:00.000-07:00

ಹುಡುಗಿಯರು, ಬಟ್ಟೆ ತೊಟ್ಟು ಅರೆಬರೆ,
ಬೆಂಗಳೂರಿನ ರಸ್ತೆಯಲಿ ನಡೆದಾಡುವರು!
ಬಡತನವಿದೆಯೆಂದು ದಯದಲಿ ನೋಡಿದರೆ,
ಸಭ್ಯತೆ ಇಲ್ಲೆಂದು ನಮ್ಮ ಜರಿಯುವರು!!

ನಾಯಿ-ನಾಯಕರು

2010-09-07T00:56:00.001-07:00

ಹಾಯಾಗಿ ತಿಂದುಂಡು, ಎಸೆದ ತಂಗಳು,
ಬೆಳೆವರು, ಬೀದಿ ಬೀದಿಯಲಿ ಈ ನಾಯಿಗಳು!
ಹಗಲಿರುಳೆನ್ನದೆ ಬೊಗಳುವರು, ಕಿರುಚುವರು,
ಸದ್ಯ ಬೆಂಗಳೂರಿಗೆ ಇವರೇ ನಾಯಕರು!!

ಓಲುಮೆ

2010-09-04T01:06:00.001-07:00

ಅರಿತೆನೇ ಚೆಲುವೆ ನಿನ್ನಿಂದ,
ಒಲುಮೆ ಎನೆಂದು.
ಮಂಜಿನಲಿ ಧರೆಗಿಣುಕುವ
ಸೂರ್ಯನ ಕಿರಣಗಳೆಂದು,
ವರ್ಣಿಸಲಸದಳ, ಭವ್ಯ ಸುಂದರ,
ತಂಪನೀಯುವ ಪ್ರೇಮ ಸಾಗರ.

ಇದು ಮಬ್ಬಿನಲಿ ಕೈಗೆ ಸೋಕುವ ಇಬ್ಬನಿ,
ಚಿಲಿಪಿಲಿಗುಟ್ಟುವ ಹಕ್ಕಿಗಳ ಮಾರ್ದನಿ,
ಸದ್ದಿಲ್ಲದೆ ಹರಿಯುತಿಹ ಪ್ರೇಮ ತರಂಗಿಣಿ
ಕ್ಷಣದಲಿ ಸೆಳೆವ ಕ್ಷಿಪ್ರ ಸಂಮೋಹಿನಿ.

ಇದು ತಲ್ಲಣಿಸಿ ಸಾಗುತಿಹ ನೀರ ಝರಿ,
ಮನವಿ ಕೊಟ್ಟು ಮಾಡಿಸಿದ ನವಿಲುಗರಿ,
ನಿಂತು ಅರಳುತಿಹ ತಾವರೆಯ ಹೂವು
ಮುತ್ತಿಟ್ಟು ಓಡುತಿಹ ತಂಗಾಳಿಯ ಹರಿವು.

ನೂರಾರು ಭಾವವನು, ಮನಕೆ ಅಪ್ಪಳಿಸಿ,
ಎಲ್ಲವನು ತಾಳ್ಮೆಯಲಿ ಹಿಡಿದು ಸ್ವೀಕರಿಸಿ,
ಮಗುವಂತೆ ಉಡಿಯಲ್ಲಿ ಕಟ್ಟಿ ಸಲಹಿದೆ
ಭಿರುಸು ಕಲ್ಲಿಗೂ ನೀ ಪ್ರೇಮ ಮೂಡಿಸಿದೆ.

---ಮಹಾ

ನಾವು ಹುಡುಗರು, ಅದೇಷ್ಟು ಮೂರ್ಖರು!

2010-09-03T03:08:00.000-07:00

ಸಂಗಾತಿ ಸಿಕ್ಕಳೆಂದು,
ಪ್ರೀತಿಯಲ್ಲಿ ಬಿದ್ದೆನೆಂದು
ಖುಷಿಯಲ್ಲಿ ಮೈಯ ಮರೆತು,
ಜಗಕೆಲ್ಲಾ ಸಾರಿ ಹೇಳೋ
ನಾವು ಹುಡುಗರು, ಅದೇಷ್ಟು ಮೂರ್ಖರು!

ಸಂಗಾತಿ ಕರೆದಳೆಂದು,
ಮೈಲುದ್ದ ಸಾಲಲ್ಲಿ ನಿಂತು,
ಚೀಟಿ ಪಡೆದು, ಪಕ್ಕ ಕುಳಿತು,
ಬೋರು ಹೊಡೆಸೋ ಸಿನಿಮಾ ನೋಡೊ,
ನಾವು ಹುಡುಗರು, ಅದೇಷ್ಟು ಮೂರ್ಖರು!

ಸಂಗಾತಿಗೆ ಇಷ್ಟ ಎಂದು,
ದುಬಾರಿ ಹೋಟೆಲ್ಲಿಗೆ ಕರೆದು,
ದುಡ್ಡು ಸುರಿದು,ತಿಂದು ಕುಡಿದು,
ಹುಡುಗಿ ಮನಸ, ಗೆದ್ದೆನೆಂದು, ಬೀಗೊ,
ನಾವು ಹುಡುಗರು, ಅದೇಷ್ಟು ಮೂರ್ಖರು!

ಸಂಗಾತಿ ನುಡಿದಳೆಂದು,
ಕಣ್ಣೀರ ಹರಿಸಿದಳೆಂದು,
ಗಟ್ಟಿಯಾಗಿ ಕೈಯ ಹಿಡಿದು
ಮದುವೆಯಾಗಿ, ಬಂಧಿಯಾಗೋ
ನಾವು ಹುಡುಗರು, ಅದೇಷ್ಟು ಮೂರ್ಖರು!

-----ಮಹಾ,

ನಮಗೇಕೆ ರಾಜಕಾರಣ--

2010-09-02T01:11:00.000-07:00

ನಮಗೇಕೆ ರಾಜಕಾರಣ--
ನಾವೇನು ಕೋಟಿ ಕೋಟಿ ಉಳ್ಳವರೆ,
ಮಾತಿನಲೆ ಮನೆಕಟ್ಟುವ ಛಾತಿಯವರೆ,
ದಿನವೂ ಟೀಕೆಗೆ ಮೈ ಒಡ್ಡುವವರೆ,
ನಾವೇನು ಪುಢಾರಿಗಳ ಚಮಚಾಗಳೇ!

ನಮಗೇಕೆ ರಾಜಕಾರಣ--
ಎಲ್ಲಿಯೂ ಗಣಿ ಇಲ್ಲದ ಮೇಲೆ,
ಬಾರ್ ನಡೆಸುವವರಲ್ಲದ ಮೇಲೆ,
ಒಂದಿಷ್ಟು ಜನರನ್ನು ಕೊಲ್ಲಲಾಗದಿದ್ದರೆ,
ನಾಲಿಗೆ ಸೀಳಿ, ಕತ್ತು ಕೊಯ್ಯಲಾಗದಿದ್ದರೆ!

ನಮಗೇಕೆ ರಾಜಕಾರಣ--
ಕೋಮು, ಜಾತಿ, ಎಲ್ಲ ಬಿಟ್ಟವರಿಗೆ,
ಜನತೆಯ ಕಷ್ಟಗಳಿಗೆ ಮರುಗುವವರಿಗೆ,
ಭ್ರಷ್ಟಾಚಾರದ ವಿರೋಧಿಗಳಿಗೆ,
ನಾಚಿಕೆ ಮಾನ ಮರ್ಯಾದೆ ಬಿಡದವರಿಗೆ!

ನಮಗೇಕೆ ರಾಜಕಾರಣ--
ಇರುವುದೇ ಲೇಸು,
ಮತವ ನೀಡಿ, ಕೊರಗುವ,
ಸಾಮಾನ್ಯ ಪ್ರಜೆಯಾಗಿ,
ಹುಲ್ಲು ತಿಂದು, ಹಾಲು ಕೊಡುವ
ಕೊಟ್ಟಿಗೆಯ ದನವಾಗಿ,

----ಮಹಾ

ಪ್ರೀತಿಯ ಕಾರಣ

2010-09-02T00:28:00.000-07:00

ಹುಡುಗ--
ಹೇಳು ಗೆಳತಿ ನಿಜದಿ ಇಂದು,
ನಾನೇನ ಮೋಡಿ ಮಾಡಿದೆ.
ಕಾರು ನಡೆಸೋ ಚಾಲಕ ನಾನು,
ನನ್ನ ಏಕೆ ಪ್ರೀತಿಸಿದೆ!!
ಹುಡುಗಿ--
ಪ್ರೀತಿಯಿಲ್ಲ, ಮೋಡಿಯಿಲ್ಲ,
ದಿನವೂ ನಿನ್ನ ನೋಡಿದೆ!
ಮನೆಯ ಮುಂದೆ ಕಾರು ನೋಡಿ,
ನಿನ್ನವೆಂದೇ ಭಾವಿಸಿದೆ!!

------ಮಹಾ

ಪುಣ್ಯವಂತರು

2010-09-02T00:26:00.000-07:00

ಇವರೇ ನೋಡಿ ಜಗದಲಿ ಅತಿ ಪುಣ್ಯವಂತರು,
ಪ್ರತಿ ದಿನವೂ ಬಸ್ಸಿನಲಿ ಸೀಟು ಗಿಟ್ಟಿಸುವವರು!
ಎಲ್ಲರನೂ ನೂಕಿ ಮೊದಲು ಹತ್ತುವ ಇವರು,
ಭುವಿಯಲ್ಲೇ ಸ್ವರ್ಗ, ಅನುಭವಿಸುವವರು!!!

------ಮಹಾ

ಅಪ್ಪನ ಕಿವುಡು

2010-09-02T00:24:00.000-07:00

ಅಮ್ಮ ಹೇಳುವಳು, ನನ್ನಪ್ಪ ಕಿವುಡನೆಂದು,
ಮದುವೆಯಾ ನಂತರ ಹೀಗಾಯ್ತೆಂದು!
ನನ್ನ ಮಡದಿಯಿಂದ ನಾ ಅರಿತೆನಿಂದು,
ನಿಜದಿ ನನ್ನಪ್ಪ ಎಷ್ಟು ಬುದ್ಧಿವಂತನೆಂದು!!

------ಮಹಾ

ಮಾವನ ಮನೆ ಸತ್ಕಾರ

2010-09-02T00:23:00.000-07:00

ಮಾವನ ಮನೆಯಲಿ ನನಗೆ ಬಹಳ ಸತ್ಕಾರ,
ಕುಳಿತಲ್ಲೆ ಕಾಫಿ ತಿಂಡಿ, ಔತಣ ಭರಪೂರ!
ಅರಿಯುವೆನು ಆಮೇಲೆ ಇಷ್ಟೆಲ್ಲಾ ಯಾಕೆಂದು,
ಮನೆಗೆ ಬೇಗನೆ ಮಗಳ ಕರೆದೊಯ್ಯದಿರಲೆಂದು!!!

------ಮಹಾ

ಅಡುಗೆ ಬಾರದ ಮುಗ್ಧೆ

2010-09-02T00:22:00.000-07:00

ಜರಿದೆನು ಮಡದಿಯನು ಅಡುಗೆ ಬಾರದೆಂದು,
ಏನೇನು ಅರಿಯದ ಮುಗ್ಧೆಯೆಂದು!
ಕರೆದಳು ವೈಯಾರದಲಿ ತನ್ನ ಬಳಿಗೆ,
ಈಗ ಪ್ರತಿದಿನವು ನನ್ನದೇ ಅಡುಗೆ!!!

------ಮಹಾ

ಗಂಡನ ಕೆಲಸ

2010-09-02T00:21:00.000-07:00

ದಿನವೂ ನೋಡುತ್ತಲಿದ್ದೆ ಬಸ್ಸಿನಲಿ ಅವಳನು,
ಹತ್ತಿರ ಬಂದಳು ಒಂದುದಿನ ಚೆಲ್ಲಿ ನಗುವನು!
ಕೂತ ಸೀಟು ಬಿಟ್ಟುಕೊಟ್ಟೆ ಅವಳಿಗಾಗಿ,
ಈಗ ದಿನವೂ ಸೀಟು ಹಿಡಿಯುವ ಕೆಲಸ
ಅವಳ ಗಂಡನಾಗಿ!!

------ಮಹಾ

ಹುಡುಗಿಯರು

2010-09-02T00:19:00.002-07:00

ಹುಡುಗಿಯರೆನು ಅಬಲೆಯರೆ,
ಕೈಲಾಗದ ಕೊಮಲೆಯರೆ!
ನಗುವಿನಲೆ ಹುಡುಗರನು ಕೊಲ್ಲುವಾ ಇವರು
ಶಿಕ್ಷೆಗೆ ನೂಕಲಾಗದ ಕೊಲೆಗಾರರು!!

------ಮಹಾ

ಗೆಳತಿ - ಹೆಂಡತಿ

2010-09-02T00:19:00.001-07:00

ಆಗವಳು ನನ್ನ ಗೆಳತಿ,
ಬಹು ತೀಕ್ಷ್ಣಮತಿ, ಬಲು ರೂಪವತಿ!
ಈಗವಳು ನನ್ನ ಹೆಂಡತಿ,
ಮಂದಮತಿ, ಗಜದೇಹದೊಡತಿ!!

------ಮಹಾ

ಹುಡುಗಿಯರ ಮಾತು

2010-09-02T00:17:00.000-07:00

ಇಂದಿನ ಹುಡುಗಿಯರು,
ಮಾತಿನಲಿ ಬಲು ಜೋರು!
ಅರಿಯರು ಕಷ್ಟಗಳ ಒಂದಿನಿತು..
ಜರಿವರು ಸಂಸ್ಕೃತಿಯ ಋಣವ ಮರೆತು!!

------ಮಹಾ

ಮಟ್ಕಾ ನಂಬರು

2010-09-02T00:16:00.000-07:00

ಹುಡುಕಿದರು, ಕೆದಕಿದರು, ಮಟ್ಕಾದ ನಂಬರು..
ಏನೇನೊ ಲೆಕ್ಕಮಾಡಿ, ಚೀಟಿ ಬರೆದು ಕೊಟ್ಟರು!
ಇರುವುದೆಲ್ಲವ ಬಿಟ್ಟು, ಇರದಿದ್ದುದು ಬಂದು, ತಲೆ ಕೆಡಿಸಿಕೊಂಡು..
ಕೂತ್ಗೋಂಡರು ಮನೆಯಲ್ಲೇ ಮರುದಿನದ ನಂಬರ್ ಹುಡ್ಕೊಂಡು!!

------ಮಹಾ

ಹೆಂಡತಿಯ ಕೋರಿಕೆ

2010-09-02T00:15:00.001-07:00

ನನ್ನವಳು ಕೇಳಲಿಲ್ಲ ಇದುವರೆಗೂ, ಒಡವೆ, ಸೀರೆ,
ಇವಳು ಎಂದೂ ಕೇಳಲಿಲ್ಲ, ಬಾನಿನಾ ತಾರೆ....
ಇದುವರೆಗೂ ಇವಳೂ ಕೇಳುವದು ಒಂದೆ
ಸಾಕು ಪ್ರಿಯಾ, ಮಗು ನಮಗೊಂದೆ!!!

------ಮಹಾ

ಹುಡುಗಿಯ ಪ್ರೇಮ

2010-09-02T00:14:00.001-07:00

ಹುಡುಗ ಕೇಳಿದ,
ಪ್ರಿಯೆ, ಆಗುವೆಯಾ ನೀ ನನ್ನ ಮದುವೆ?
ಹುಡುಗಿ ಕೇಳಿದಳು,
ಪ್ರಿಯಾ,ನೀನೆಷ್ಟು ಮಾಡಿಸುವೆ ನನಗೆ ಒಡವೆ?
ಹುಡುಗ ಹೇಳಿದ,
ಪ್ರಿಯೆ, ನಾನು ಬಡವ, ಆದರೆ ನಾನು ಹೃದಯದಲಿ ಶ್ರೀಮಂತ..
ಹುಡುಗಿ ಹೇಳಿದಳು,
ಸರಿ ಹಾಗಾದರೆ, ಹುಡುಕಿಕೊ ಕಡುಬಡವಳನು ನಿನಗಿಂತ!!

------ಮಹಾ

ಮಠ

2010-09-02T00:09:00.000-07:00

ನಮ್ಮ ಮನೆಯಲಿ ದಿನವೂ ಹೊಡೆದಾಟ,
ಶುರುವಿಗೆ ಕಾರಣ ನನ್ನ ತುಂಟಾಟ,
ಮುಂದುವರಿಸುವದು ಅವಳ ಹಠ,
ಹೀಗಾಗಿ ಸೇರ ಬಯಸಿದ್ದೇನೆ
ಯಾವುದಾದರೂ ಒಳ್ಳೆ ಮಠ!!!
------ಮಹಾ

ನಗುವಿನ ಕಾರಣ

2010-09-02T00:06:00.000-07:00

ಏಲ್ಲರೂ ಹೊಗಳಿದರು,
ಹುಡುಗಿ ನಗುನಗುತಿರುವ
ಹಸನ್ಮುಖಿ,
ಹೋಗಿ ನೋಡಿದೆ,
ತಿಳಿಯಿತು ನಗುವಿಗೆ ಕಾರಣ,
ಹಲ್ಲು ಬಾಹ್ಯಮುಖಿ

------ಮಹಾ

ರೋಮಾಂಚನ

2010-09-02T00:04:00.000-07:00

ನನ್ನವಳು ನಕ್ಕರೆ,
ನನಗೆ ರೋಮಾಂಚನ!
ಯಾಕೆಂದರೆ
ಅವಳು ನಗುವದು,
ಅಮವಾಸ್ಯೆಗೊಂದೆ ದಿನ!!!

------ಮಹಾ

ಕವಿತೆ

2010-08-28T01:26:00.000-07:00

ನನ್ನವಳು
ಬರೆದು ಬರೆದು ಪ್ರೇಮ ಕವಿತೆ,
ನನ್ನವಳಿಗೆ ನೀಡಿದೆ.
ಹೇಳಿದಳವಳು ಅಲ್ಲಿ ಕುಳಿತೆ,
ನಿಜದಿ ಹುಚ್ಚು ಏರಿದೆ!!

ಧನವಂತ
ನನ್ನ ಮಾವ ಬಹಳ ಶ್ರೀಮಂತ,
ನನ್ನ ಮದುವೆಗೂ ಮೊದಲು!
ನಾ ಅವನನೂ ಮೀರಿಸಿದ ಧನವಂತ
ಕಾರಣ ಅವನ ಮಗಳು!!!

ಊಡುಗೊರೆ
ಮಾವನ್ ಮನೆಗೆ ಹೆಂಡ್ತಿನ್ ಕರ್ಕೊಂಡ್
ಹೋಗೊಕೆ ನನಗೆ ಬಹಳಾ ತೊಂದರೆ!
ಮರೀತಿನ್ ಕಷ್ಟನೆಲ್ಲಾ, ನೆನ್ಸ್ಕೊಂಡ್,
ಮಾವಾ ಕೊಡೊ ಉಡುಗೊರೆ!!!!
--ಮಹಾ

ನಾನೇನ ಅರ್ಪಿಸಲಿ?

2010-08-26T04:35:00.000-07:00

ಭುವಿಗೆ ಬೀಳುತಲೆ ತಬ್ಬಿ ಹಿಡಿದು
ರಚ್ಚೆ ಹಿಡಿಯುತಲೆ ಕಣ್ಣ ತೆರೆದು
ಎದೆಗೆ ಅವುಚಿ ಹಾಲು ಕುಡಿಸಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಮಲಗಿದಲ್ಲೆ ಬೋರಲು ಬೀಳಿಸಿ
ದೂರದಲ್ಲಿ ಆಟಿಕೆ ಇಡಿಸಿ
ಅಂಬೆ ಹರಿಸಿ, ಸಂಭ್ರಮಿಸಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಹೆಜ್ಜೆ ಮೇಲೆ ಹೆಜ್ಜೆ ಇಟ್ಟು
ನಡೆವಾಗ ನಾನು ಕಷ್ಟಪಟ್ಟು
ಬೀಳದಂತೆ ಆಸರೆ ನೀಡಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಮಾತು ಬರದೆ ತೊದಲುವಾಗ
ಮಣ್ಣ ತಿಂದು ತೇಗುವಾಗ
ಬರಸೆಳೆದು ಹಣೆಗೆ ಮುತ್ತನಿಕ್ಕಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಗೆಳಯರೊಡನೆ ಆಡುತಿರಲು
ತಿಂಡಿ ತಿನಿಸು ಬೇಡುತಿರಲು
ಗದರಿ ಶಾಲೆಗೋಗು ಎಂದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಹಸಿದು ಬಂದ ನನಗೆ ಬಡಿಸಿ
ತನಗೆ ತಿಳಿದ ವಿದ್ಯೆ ಕಲಿಸಿ
ಸುಖ ಜೀವನಕ್ಕೆ ದಾರಿ ತೋರಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

---ಮಹಾ

ಗೆಳತಿಯಾ ನೆನಪು

2010-08-25T01:40:00.000-07:00

ಕನಸಾಯಿತು, ಕಳೆದು ಹೋಯಿತು,
ಮನದ ದುಗುಡ ನಿಜವಾಯಿತು.
ಬಂಧ ಹರಿಯಿತು ಮನ ಮಿಡಿಯಿತು
ಗಾಢ ಕತ್ತಲೆಗೆ ಮನವು ಸರಿಯಿತು.

ಬಂದೆ ಬಾಳಲಿ ಬೆಳದಿಂಗಳಂತೆ.
ಚಪ್ಪರದಲಿ ಇಣುಕುವ ಕಿರಣದಂತೆ
ಕುಡಿಯೊಡೆದಿತ್ತು ಹರುಷದ ನವ ಬಾಳು
ಕನಸು ಗರಿಗೆದರಿ ಮುಟ್ಟಿತ್ತು ಮುಗಿಲು.

ಉಸಿರು ಬಿಸಿ, ಮನದ ತವಕ,
ಸಂದೇಶಕೆ ಕಾಯುವದೆ ನಿತ್ಯ ಕಾಯಕ
ಮನದಾಳದಿ ಬೆಳೆದಿತ್ತು ಬೆಟ್ಟದಷ್ಟು ಪ್ರೀತಿ
ಅದುಮಲಾಗದೆ ಹೋಯ್ತು ಮನದ ಭೀತಿ.

ದೂರಾದೆ ಒಂದಿನಿತು ಕರುಣೆ ಇಲ್ಲದೆ,
ತೊರೆದೆ ಸಂಪರ್ಕಗಳ ಕಾರಣ ಕೊಡದೆ
ಸುಡುತಿದೆ ಒಡಲ ಪ್ರೀತಿಯಾ ಚಿತೆ
ನಾ ಹೇಳದಾದೆ...
ನೀ ಏಕೆ ಅರಿಯದಾದೆ?.....

----ಮಹಾ

2010-08-25T00:52:00.000-07:00

ಪ್ರೀತಿ - ಯುದ್ಧ

ಪ್ರೀತಿ ಜಯಿಸಲಾಗದ ಮಹಾ ಯುದ್ಧ
ಜನಿಸುವಾಗಲೆ ಇದಕೆ ಮರಣ ಶತಃಸಿದ್ದ
ಪ್ರೀತಿಸಲೇ ಬಾರದು ನಾವೆಂದೆಂದು ಮನಕೊಟ್ಟು
ಬಿಡಬಾರದು ಹೃದಯಕ್ಕೆ ಯಾರನ್ನೂ ಮತಿಗೆಟ್ಟು.

ಪ್ರೀತಿ - ಹೇಗೆ?

ಹೇಳು ಗೆಳತಿ ನಾ ನಿನ್ನ ಹೇಗೆ ಪ್ರೀತಿಸಲಿ!
ಒಡೆದೋದ ಹೃದಯದಲಿ ನಿನ್ನ ಹೇಗೆ ಕೂರಿಸಲಿ!
ಇನ್ನೆಷ್ಟು ಪ್ರೀತಿಸಲಿ ಈ ನಿತ್ರಾಣ ದೇಹದೆಲೆ!
ಯೊಚಿಸಬೇಕಾಗಿತ್ತು ಗೆಳತಿ ಚೂರಿಯಿಕ್ಕುವ ಮೊದಲೆ!!

ಪ್ರೀತಿ - ಹೃದಯ

ಪ್ರೀತಿಸಿದೆನೇ ನನೊಂದು ಮುಳ್ಳು ಹೃದಯವನು!
ಸೌಂದರ್ಯ ಲೇಪನದ ಕಲ್ಲು ಮೂರ್ತಿಯನು!
ಪ್ರೀತಿ ಮಾಯೆ ಎಂಬುದ ಅರಿಯದಾ ನಾನು
ಉರಿವ ಬೆಂಕಿಗೆ ದೂಡಿದೆನೇ ಈ ಜೀವನವನು!!

ಪ್ರೀತಿ - ನೋವು

ನನ್ನೊಲವು ಎಷ್ಟೆಂದು ನಾ ಹೇಗೆ ವರ್ಣಿಸಲಿ
ನಿನಗೆಂದೆ ತೆಗೆದಿಟ್ಟ ಈ ನನ್ನ ಜೀವದಲಿ
ಪ್ರೀತಿಸಿದೆ ನಿನ್ನನ್ನೇ ಪರಿಪೂರ್ಣ ಮನಸಿನಲಿ
ಗೆಳತೀ
ಏನು ಸುಖ ಕಂಡೆ ನನ್ನ ನೋಯುಸುವಲ್ಲಿ!!

ಪ್ರೀತಿ - ಮಾಯೆ

ನಡೆನಡೆದೆ ಪ್ರೀತಿಸಲು ಮಾಯಾದಾರಿಯಲಿ!
ಹಿಂದಿರುಗಿ ನೋಡದೆಲೆ ಒಂದೆ ಉಸಿರಿನಲಿ!
ಸಿಕ್ಕಂತೆ ಭಾಸ ಪ್ರತಿ ಹೆಜ್ಜೆ ಇಡುವಾಗಲು!
ಅರಿತೆನೀಗ ಇದು ಕೈಗೆಟುಕದಾ ಕೆಂಬಣ್ಣದ ಬಿಸಿಲು!!

ಮಾತು - ಧ್ಯಾನ

ನಾವ್ ನುಡಿದಾ ಮಾತು ಹೆಚ್ಚೆಂದು ಕಂಡಾಗ
ಮೌನದಲೆ ಇರುವುದು ಲೇಸೆನ್ನ ಬೇಕು!
ಪ್ರೀತಿ ಹುಚ್ಚೆದ್ದು ಮಿತಿ ಮೀರಿದಾಗ
ಧ್ಯಾನದೆಲೆ ಮನಸನ್ನು ಕಳೆದು ಬಿಡಬೇಕು!!

-----maha

ಇದೆನಾ ಬಹುಮಾನ!

2010-08-25T00:12:00.000-07:00

ಕಳೆಯಿತೇ ಪ್ರೀತಿಯಾ ಆ ಕ್ಷಣಗಳು
ಸಡಿಲಾಯಿತೇ ಅಪ್ಪುಗೆಯ ಆ ಬಂಧಗಳು!
ಮುಗಿಯಿತೇ ಚೆಲ್ಲಾಟದ ಆ ದಿನಗಳು!
ಬಾಡಿತೆ ನಾ ಕೊಟ್ಟ ಎಲ್ಲ ಹೂವುಗಳು!!

ನಿನ್ನೇ ಪ್ರೀತಿಸಿದೆ, ಅನುಕ್ಷಣವು, ಅನುದಿನವು,
ಅರ್ಪಿಸಿದೆ ನನ್ನನ್ನೇ, ನಿನದೆ ಈ ಜೀವನವು,
ಮಾತಿನಲಿ ಮೌನದಲಿ ಎಲ್ಲೆಲ್ಲು ನೀನೆ,
ಎಲ್ಲದಕೂ ನೀನಿಂದು ಮಾಡಿದೆಯಾ ಕೊನೆ!!

ಎಲ್ಲಿ ಆ ಸಂದೇಶಗಳು, ತೇಲುವಾ ಮುತ್ತುಗಳು!
ಎಲ್ಲಿ ಬಿಗಿದಪ್ಪಿದಾ ಆ ಕೋಮಲ ಕೈಗಳು!
ಎಲ್ಲಿ ತಂಗಾಳಿ ನೀಡಿದ ಆ ಉಪವನಗಳು!
ಎಲ್ಲಿ ಕಿವಿಗುಸುರಿದ ಪ್ರೇಮದ ಅಣಿಮುತ್ತುಗಳು!!

ಬೇಡವಾಯಿತೇ ಇಂದು ನನ್ನ ಸಾಂಗತ್ಯ!
ಮುಗಿಸಿವೆಯಾ ನಮ್ಮೀರ್ವರ ಪ್ರೇಮ ದಾಂಪತ್ಯ!
ರುಚಿಸದಾಯಿತೇ ನಾ ಹೇಳುವ ಹಿತಮಾತುಗಳು!
ಹಿಡಿಸದಾಯಿತೇ ನಾ ಓದುವ ಪ್ರೇಮ ಕವನಗಳು!!

ಕಲ್ಲಾಯಿತೇ ಗೆಳತಿ ನಿನ್ನ ಕೋಮಲ ಹ್ರದಯ!
ಅರಿಯೆಯಾ ಒಡಲೊಳಗೆ ನೀ ಮಾಡಿದಾ ಗಾಯ!!
ಬಿಡಬಾರದೆ ನನಗಾಗಿ ಆ ನಿನ್ನ ಬಿಗುಮಾನ!
ಅತಿಯಾಗಿ ಪ್ರೀತಿಸಿದ್ದಕ್ಕಾಗೆನಾ ಈ ಬಹುಮಾನ!!

----ಮಹಾ

ನನ್ನ ಹೆಂಡತಿಯ ಅಡುಗೆ

2010-08-24T23:30:00.000-07:00

ಯಾರ್ಯಾರು ಸವಿದಾರು ಈ ಬಗೆಯ ಪಾಕವನು!
ಜೊಲ್ಸುರಿಸಿ ಚಪ್ಪರಿಸೋ ಬಗೆಬಗೆಯ ಖಾದ್ಯವನು!!
ಸವಿಸವಿದು ತೇಗುವಾ ಭಾಗ್ಯ ನನಗೊಬ್ಬನಿಗೇ!
ನಾ ಹೇಗೆ ಹೊಗಳಲಿ ನನ್ನ ಹೆಂಡತಿಯ ಅಡುಗೆ?

ಮುಂಜಾನೆ ನಾನೆದ್ದು ತಿಂಡಿಯಾ ನೆನೆಸೆ!
ಕೈಗಿಡುವಳು ಆರೇಳು ನೀರಿನಾ ದೋಸೆ.!!
ಹಾಲು ಕೈಗಿತ್ತು ಕೇಳುವಳು ಆಸ್ರೀಗೆ ಹೇಗೆ?
ನಾ ಏನು ಹೊಗಳಲಿ ನನ್ನ ಹೆಂಡತಿಯ ಅಡುಗೆ?

ಮುದ್ಮುದ್ದೆ ಚಿತ್ರನ್ನ, ಪುಳಿಯೊಗರೆ ಪಲಾವು,
ಪ್ರತಿದಿನವು ಹೊಸ ರುಚಿಯ ಅನುಭವವು
ಅನ್ನ ಮೊಸರು, ಸಾರು ಮಧ್ಯಾಹ್ನಕೆ, ರಾತ್ರಿಗೆ,
ನಾ ಹೇಗೆ ವರ್ಣಿಸಲಿ ನನ್ನ ಹೆಂಡತಿಯ ಅಡುಗೆ?

ಸೀದೋದ ಓಗ್ಗರಣೆ, ಅರೆಬೆಂದ ಪಲ್ಯ,
ನೆನಪಿಸುವಳು ದಿನವೂ ಉಪ್ಪಿನಾ ಮೌಲ್ಯ
ಜಾಮೂನು, ಪಾಯಸ, ಒಮ್ಮೊಮ್ಮೆ ನಾಲಿಗೆಗೆ
ಎನಿತು ವರ್ಣಿಸಲಿ ನನ್ನ ಹೆಂಡತಿಯ ಅಡುಗೆ?

ನಗುನಗುತ ಬಡಿಸುವಳು ಬಲು ಪ್ರೀತಿಯಲಿ
ಮರೆಯುವೆನು ಜಗವೆಲ್ಲ ಇವಳ ಸನಿಹದಲಿ
ಸರಿಸಾಟಿ ಏನುಂಟು ನನ್ನವಳ ಒಲವಿಗೆ?
ನಾ ಹೇಗೆ ಹೊಗಳಲಿ ಇವಳ ಪ್ರೀತಿಯಾ ಬಗೆ?

ನೆನಪುಗಳ ತುಣುಕು

2010-08-02T04:09:00.000-07:00

ನೆನಪಾಗುತಿದೆ ಗೆಳತಿ ನಮ್ಮಿಬ್ಬರ ಆ ಮಿಲನ
ನಸುನಾಚಿ ತಂದಿಟ್ಟ ಆ ಭಾರಿ ಔತಣ,
ಕಡೆಗಣ್ಣಿನಲೆ ನನ್ನ ನೋಡಲು ಕಾತರಿಸಿದ ಆ ಕಣ್ಣು
ಬಂಧಿಸಿದೆ ಆ ನೋಟದಲೆ ಈ ನನ್ನ ಮನಸನ್ನು.

ನಡೆದಿತ್ತು ನೆಂಟರದು ಏನೇನೊ ಸಂವಾದ
ಕ್ಷಣ ಕ್ಷಣಕೂ ಏರುತ್ತಿತ್ತು ನನ್ನೆದೆಯ ನಿನಾದ.
ತೋರಿದರು ಇಬ್ಬರಿಗೂ ಮಹಡಿಯಾ ದಾರಿ
ಅಳುಕುತಲೆ ಮುನ್ನಡೆದೆ ಮೆಟ್ಟಿಲನು ಏರಿ.

ಎಗ್ಗಿಲ್ಲದೆ ಸಾಗಿತು ನನ್ನ ಪರಿಚಯ ಭಾಷಣ
ನಿನ್ನದೋ ಚುಟುಕು ಉತ್ತರ, ಆಮೇಲೆ ಬರೀ ಮೌನ.
ತೆರಿದಿಟ್ಟೆ ನನ್ನೆಲ್ಲಾ ಜೀವನದ ಆಸೆ
ಸುಖಬಾಳು ಬಯಸಿದ ನಿನಗಿತ್ತೆ ಭಾಷೆ.

ನಂತರದ್ದೆಲ್ಲಾ ಮಧುರಾತಿ ಮಧುರ
ಮನ ತುಂಬಿ, ಮನ ಬೆಳಗಿ, ನನಗಿತ್ತೆ ಉಸಿರ.
ಭಾವ ತುಂಬಿದೆ, ನಿನ್ನೊಡನೆ ಬಾಳ ಮುನ್ನಡೆಸುವ
ಭುವಿಯಲ್ಲೆ ನೀಡಿದೆ, ಸ್ವರ್ಗದನುಭವವ.

--ಮಹಾ

ಓ ನನ್ನ ಉಸಿರೆ

2010-06-25T01:49:00.000-07:00

ನುಡಿಯಲಾರೆ ನಲ್ಲೆ ನಿನ್ನೀ ಒಲುಮೆಯ
ನೆನೆದೊಡನೆ ಸಿಗುವ ಆ ಸವಿಯ!
ನಿಲ್ಲದಾಗಿದೆ ಮನ ನನ್ನೊಳಗೆ
ನೀರಾಗಿ ಪ್ರೀತಿ ಜಾರಿದೆ ಒಡಲೊಳಗೆ!!

ನಿತ್ಯ ಸಂಭ್ರಮ, ಮುಗುಳ್ನಗು ಅನುದಿನ
ನಿರತ ಮನದೊಳು ನಿನದೆ ಧ್ಯಾನ!
ನವ್ಯ ಜೀವನ, ಪ್ರೀತಿ ಅನುಕ್ಷಣ
ನೂರು ಜನುಮಕು ಇದು ಬಿಡದ ಬಂಧನ!!

ನೀಡಿದೆ ನೀ ನನಗೆ ನವ ಜೀವನ
ನೋವ ಮರೆಸಿದ ಪ್ರಿಯೇ, ನಿನಗಿದೊ ನಮನ!
ನೆನಪು ಬಲವಾಗಿದೆ, ವಿರಹ ಬಾಧಿಸುತಿದೆ
ನವ ಪ್ರೇಮದ ಕುರುಡು ಕಾಡಿದೆ!!

ನಡೆದು ಬಂದೆ ನನ್ನ ಬಾಳ ಅರಮನೆಗೆ
ನಿಂತೆ ಏರಿ ಹ್ರದಯ ಗದ್ದುಗೆಗೆ!
ನೀನಿಲ್ಲದಾ ಬಾಳು ನಾ ಊಹಿಸಲಾರೆ
ನೀನೆ ನನಗೆಲ್ಲ, ಓ ನನ್ನ ಉಸಿರೆ!!

----ಮಹಾ

ನಿರೀಕ್ಷೆ

2010-05-07T23:45:00.000-07:00

ಭಾವ ಬೆಳೆದು ಭಾವನೆಯಾಯ್ತು,
ಮನಸು ಬಿರಿದ ಮಲ್ಲಿಗೆಯಾಯ್ತು,
ಮಾತು ಮರೆತು ಮೌನ ನೆಲೆಯಾಯ್ತು,
ನನ್ನೆದೆಯ ಪ್ರೀತಿ ನಿನ್ನೆಡೆಗೆ ಸರಿಯಿತು.

ನಮ್ಮಿಬ್ಬರ ಈ ಮಿಲನ, ಬಾಳಿನ ಸುದಿನ,
ಪ್ರತಿ ಜನ್ಮದಲೂ ನವನವೀನ,
ಈ ಘಳಿಗೆ ಅಮೃತಕೆ ಸಮಾನ
ಪಾವನವಾಯ್ತು ಗೆಳತಿ ಈ ನನ್ನ ಜೀವನ.

ಕಾದಿದೆ ಮನ ನಿನ್ನೆದೆಯ ಮಾತಿಗೆ
ತಂಪನೀಯುವ ನವಿರು ತಂಗಾಳಿಗೆ
ಇಂಚರದ ಇಂಪಾದ ಶಬ್ಧ ಸಂಗೀತಕೆ
ಎಳೆ ರಶ್ಮಿ ಸೋಕುವ ಮಧುರ ಅನುಭವಕೆ.

ಹೇಳಿಬಿಡು ಗೆಳತಿ ನನ್ನ ಕಾಯಿಸಬೇಡ
ತವಕದಿಂದಿಹ ನನ್ನ ನೋಯಿಸಬೇಡ
ನನ್ನೀ ಜೀವನಕೆ ನೀ ಜೋತೆಯಾಗುವೆಯಾ?
ಹೇಳು ನೀ ನನ್ನ ಪ್ರೀತಿಸುವೆಯಾ?
ಹೇಳು ನೀ ನನ್ನ ಪ್ರೀತಿಸುವೆಯಾ???

----ಮಹಾ

ಬೆಂಗಳೂರು ಬಸ್ಸಿನ ಅನುಭವ

2010-04-15T00:50:00.000-07:00

ಬೆಂಗಳೂರು ಬಸ್ಸಿನ ಪಯಣ
ನರಕದನುಭವಕೆ ಸುಲುಭ ವಿಧಾನ!!
ಹತ್ತಿದೊಡನೆಯೇ ಮುಂದೆ ಸಾಗಿರೆಂಬ ಕೂಗು
ನೂಕಾಟ ಜಗ್ಗಾಟದಾ ನಡುವೆ ಸೀಟಿಲ್ಲದಾ ಕೊರಗು!!
ಸುತ್ತಮುತ್ತ ಚಿತ್ರ ವಿಚಿತ್ರ ಭಾಷೆಗಳ ಗದ್ದಲ
ನಡುವೆ ಅವರಿವರೊಡನೆ ನಿರ್ವಾಹಕರ ಜಗಳ!!
ಮುಂದೆ ಇಣುಕಿದರಲ್ಲಿ ಮನಸೆಳವಾ ನೋಟ
ನರಕದಲೂ ಕೂಡಾ ರಂಭೆ ಉರ್ವಶಿಯರ ಕಾಟ!!
ಹರಿಯುವದು ಆಗಾಗ್ಗೆ ಸೀಟಿನೆಡೆ ಗಮನ
ಎದ್ದರೆ ಅವರಿವರ ನೂಕಿ ಕೂರುವಾ ಜನ!!
ನಿಲ್ದಾಣ ಸಮೀಪಿಸಿದೊಡೆ ಇಳಿಯುವ ಕಾತುರ
ಇಳಿದೊಡನೆ ಅನುಭವ ಪಡೆದ ಹೊಸ ಉಸಿರ!!

----ಮಹಾ ಭಟ್

ಮನದ ಮಾತು

2010-04-15T00:01:00.000-07:00

ಮನಸೆ ನಿಲ್ಲು, ಹೊರಳಾಡಬೇಡ
ಕಟ್ಟಿರುವೆ ಕಚ್ಚಿದಂತೆ ಕುಣಿದಾಡ ಬೇಡ
ಬಯಕೆ ಬೊಬ್ಬಿರಿದು ಬಂಧಿಸುವ ಮೊದಲೆ
ನೆಲೆಸು ನಿನ್ನೊಳಗಿನ ಸತ್ಯ ರೂಪದೆಲೆ

ಬುದ್ಧಿ ಬಾರದೆ ನಿನಗೆ, ನಿಲ್ಲಿಸು ಕುತರ್ಕಗಳ
ತೊಚಿದೆಡೆ ಓಡುವ ಹಳೆ ಚಾಳಿಗಳ
ಸುಖ ಮರೀಚಿಕೆಯಾಯ್ತು, ದುಃಖ ನಿತ್ಯವಾಯ್ತು
ಪಾಪದ ಕೊಡ ತುಂಬಿ ಹೊರ ಚೆಲ್ಲತೊಡಗಿತು

ನೆನೆ ನೆನೆ ಗುರುಚರಣವ ತಡಮಾಡದೆಲೆ
ಇದುವೆ ಪಾಪಿಗಳ ಉದ್ದರಿಸೊ ಸನಿಹ ನೆಲೆ
ಭಜಿಸು ಅನುದಿನವು ಗುರು ನಾಮವ
ಪಾಪಗಳ ತೊಳೆವ ಸುಲಭ ಅಮೃತವ.

ಗುರುವೆ ಬೆಳಕು, ಗುರುವೆ ಬದುಕು
ಗುರುನಾಮವೆ ಚಿಂತನಕು, ಸಕಲಕು
ಗುರುವೊಂದೆ ದಾರಿ, ಭಜಿಸು ಬಿಡದೆಲೆ
ದಾಟಿಬಿಡು ಮೋಕ್ಷಕ್ಕೆ ಭೂಮಿ ನುಂಗುವ ಮೊದಲೆ

---ಮಹಾ ಭಟ್

ಮೌನಿಯಾದೆ ಏಕೆ ಗೆಳತಿ!!!

2010-04-14T23:51:00.000-07:00

ಮೌನಿಯಾದೆ ಏಕೆ ಗೆಳತಿ-
ನಿಲ್ಲಿಸಿ ಸವಿಯಾದ ಮಾತುಗಳ
ಬೆಳದಿಂಗಳ ಬೆಳಕಿನ ಚಿತ್ತಾರಗಳ
ಕೋಗಿಲೆಯ ಸವಿಗಾನದ ಸಂಗೀತಗಳ
ಮುಂಜಾನೆಯ ಎಳೆ ಸುಂದರ ರಶ್ಮಿಗಳ

ಮೌನಿಯಾದೆ ಏಕೆ ಗೆಳತಿ-
ನಿಲ್ಲಿಸಿ ಎಲ್ಲ ಹಾವ ಭಾವಗಳ
ಸಾಗರದ ತೆರೆಯ ಕಂಪನಗಳ
ಮನೆ ಗುಬ್ಬಿಯ ಕೊರಳ ಕುಣಿತಗಳ
ತಂಗಾಳಿಯ ಮಧುರ ಆನಂದಗಳ

ಮೌನಿಯಾದೆ ಏಕೆ ಗೆಳತಿ-
ನಿಲ್ಲಿಸಿ ಮುಂಗುರಳ ನಾಟ್ಯಗಳ
ಕೆನ್ನೆಯ ನಗುವಿನ ಚಿತ್ತಾರಗಳ
ನಾಸಿಕದ ಸುಂದರ ಹುಸಿ ಕೋಪಗಳ
ಚೆಲುವ ಕೆಂದುಟಿಗಳ ಚಲನೆಗಳ

--------ಮಹಾ ಭಟ್

ಮರಳಿ ಮರಳುವಾಸೆ

2009-12-31T04:15:00.000-08:00

ಮರಳುವಾಸೆ ಮರಳಿ ನನ್ನಾ ಊರಿಗೆ
ಮಮತೆಯಲಿ ಕರೆಯುತಿಹ ಅಮ್ಮನಾ ಮಡಿಲಿಗೆ!!

ಮನ ತಣಿಸುವ ಹಸಿರು ಸುಂದರ ಕಾಡಿಗೆ
ಮೋಹಕ ಕಣಿವೆಗಳ ಸೈಹಾದ್ರಿಯ ನಾಡಿಗೆ!
ಮಧುರ ಗಾನದಲಿ ನಲಿವ ಹಕ್ಕಿಗಳ ಗೂಡಿಗೆ
ಮರದೆಲೆಗಳ ನಡುವೆ ಇಣುಕುವ ಕಿರಣಗಳ ಬಳಿಗೆ!!

ಮಂದಹಾಸದಿ ನಗುತಿಹ ಕಾಡು ಹೂಗಳ ತವರಿಗೆ
ಮತ್ತೇರಿಸಿ ಬಳಿಗೆ ಕರೆಯುತಿಹ ಜನ್ಮ ಭೂಮಿಗೆ!
ಮೌನದಲೆ ನೆನೆಸುತಿಹ ಕರುಳ ಕೊಗಿನೆಡೆಗೆ
ಮರೆಯದೆ ಸೆಳೆಯುತಿಹ ಬಾಲ್ಯದೆಡೆಗೆ!!

ಮಸಣದಂತಿಹ ಈ ನಗರ, ಬಲುಕಷ್ಟ ಬಾಳ್ವೆಗೆ
ಮುಗ್ಧತೆಗೆ ನೆಲೆಯಿಲ್ಲ, ಎಲ್ಲಕಡೆ ವಂಚನೆ ಸುಲಿಗೆ!
ಮಸುಕು ತುಂಬಿದ ಮನ ಅರಸುತಿದೆ ದೀವಿಗೆ
ಮತ್ತೆ ಮತ್ತೆ ಮರಳೆನ್ನುತಿದೆ ಮನ ಊರಿಗೆ!!
ಮತ್ತೆ ಮತ್ತೆ ಮರಳೆನ್ನುತಿದೆ ಮನ ಊರಿಗೆ!!

--ಮಹಾ