ನಾನೇನ ಅರ್ಪಿಸಲಿ?

ಭುವಿಗೆ ಬೀಳುತಲೆ ತಬ್ಬಿ ಹಿಡಿದು
ರಚ್ಚೆ ಹಿಡಿಯುತಲೆ ಕಣ್ಣ ತೆರೆದು
ಎದೆಗೆ ಅವುಚಿ ಹಾಲು ಕುಡಿಸಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಮಲಗಿದಲ್ಲೆ ಬೋರಲು ಬೀಳಿಸಿ
ದೂರದಲ್ಲಿ ಆಟಿಕೆ ಇಡಿಸಿ
ಅಂಬೆ ಹರಿಸಿ, ಸಂಭ್ರಮಿಸಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಹೆಜ್ಜೆ ಮೇಲೆ ಹೆಜ್ಜೆ ಇಟ್ಟು
ನಡೆವಾಗ ನಾನು ಕಷ್ಟಪಟ್ಟು
ಬೀಳದಂತೆ ಆಸರೆ ನೀಡಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಮಾತು ಬರದೆ ತೊದಲುವಾಗ
ಮಣ್ಣ ತಿಂದು ತೇಗುವಾಗ
ಬರಸೆಳೆದು ಹಣೆಗೆ ಮುತ್ತನಿಕ್ಕಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಗೆಳಯರೊಡನೆ ಆಡುತಿರಲು
ತಿಂಡಿ ತಿನಿಸು ಬೇಡುತಿರಲು
ಗದರಿ ಶಾಲೆಗೋಗು ಎಂದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

ಹಸಿದು ಬಂದ ನನಗೆ ಬಡಿಸಿ
ತನಗೆ ತಿಳಿದ ವಿದ್ಯೆ ಕಲಿಸಿ
ಸುಖ ಜೀವನಕ್ಕೆ ದಾರಿ ತೋರಿದ
ಅಮ್ಮನಿಗೆ ನಾನೇನ ಅರ್ಪಿಸಲಿ?

---ಮಹಾ